Qazaqstandyq jas matematıkter Balqan olımpıadasynda álemniń úzdik bestigine endi
ASTANA. KAZINFORM — Qazaqstannyń jas matematıkteri halyqaralyq bilim dodasynda taǵy bir márte el abyroıyn asqaqtatty, dep habarlaıdy Oqý-aǵartý mınıstrliginiń baspasóz qyzmeti.
Rýmynııanyń Býzeý qalasynda ótken Jasóspirimder arasyndaǵy Balqan matematıkalyq olımpıadasynda (Junior Balkan Mathematical Olympiad, JBMO) ulttyq qurama joǵary nátıje kórsetip, álemniń eń myqty komandalarynyń qatarynan kórindi.
2026 jylǵy 15-20 maýsym aralyǵynda uıymdastyrylǵan bedeldi jarysqa 23 memleketten 140-qa jýyq daryndy oqýshy qatysty. Qazaqstan quramasynyń sapynda baq synaǵan alty oqýshynyń barlyǵy júldeger atanyp, qorjynymyzǵa 2 altyn, 2 kúmis jáne 2 qola medal saldy. Komandalyq esepte qazaqstandyq jas matematıkter olımpıadalyq dástúri qalyptasqan Rýmynııa, Bolgarııa jáne Frantsııa quramalarynan keıingi tórtinshi oryndy ıelenip, álemdik deńgeıdegi básekede ózderiniń joǵary áleýetin taǵy bir márte dáleldedi.
Altyn medaldardy Almaty qalasyndaǵy Nurorda mektep-lıtseıiniń 9-synyp oqýshysy Aısýltan Omar men Mańǵystaý oblystyq «Bilim-ınnovatsııa» lıtseı-ınternatynyń 9-synyp oqýshysy Sultan Tórebek jeńip aldy.
Kúmis júldege Almaty qalasyndaǵy NIS-tiń 9-synyp oqýshysy Arnur Káribaı jáne RFMM-niń 9-synyp oqýshysy Temir Orazbek ıe boldy.
Al qola medaldardy Túrkistan oblystyq «Bilim-ınnovatsııa» lıtseı-ınternatynyń 10-synyp oqýshysy Іlııas Dinmuhameduly men Pavlodar qalasyndaǵy № 8 lıtseı-mektebiniń 10-synyp oqýshysy Alıhan Kýrakbaev qanjyǵasyna baılady.
Ulttyq quramanyń halyqaralyq olımpıadaǵa qatysýyn halyqaralyq olımpıadalardyń júldegeri Marat Nsanbaev pen «Daryn» respýblıkalyq ǵylymı-praktıkalyq ortalyǵynyń mamany Perızat Saýtbekova úılestirdi.
Aıta keteıik, jasóspirimder arasyndaǵy Balqan matematıkalyq olımpıadasy — 16 jasqa deıingi oqýshylarǵa arnalǵan halyqaralyq deńgeıdegi bedeldi matematıkalyq jarystardyń biri. Qazaqstan bul bilim báıgesine 2004 jyldan beri turaqty qatysady jáne jyl saıyn joǵary nátıjeler kórsetip keledi.
Osyǵan deıin qazaqstandyq oqýshylar Eýropalyq fızıka olımpıadasynda 4 medal jeńip alǵanyn jazdyq.
