Qazaqstandyq jas hokkeıshiler álem chempıonaty joǵary dıvızıonynan túsip qaldy

ASTANA. KAZINFORM - Shaıbaly hokkeıden Qazaqstan 20 jasqa deıingi jastar quramasy álem chempıonaty joǵary dıvızıondaǵy ornyn saqtap qalý úshin Germanııamen oıyn ótkizdi.

Kezdesý barysynda qazaqstandyq hokkeıshiler alǵashqy bolyp esep ashty. Oıynnyń 4-mınýtynda Asanálı Rýslanuly kózdegen nysanadan múlt ketken joq. Kóp uzamaı germanııalyq Sakım Shefer tarazy basyn teńestirdi.

Al 17-mınýtta qazaqstandyq Nıkıta Sıtnıkov qaıtadan óz quramasyn alǵa shyǵarsa, ekinshi kezeńniń 22-mınýtynda Artýr Gross basymdyqty arttyra tústi.

Qarsylastar sapynan Maksım Shefer 23, Edvın Tropman 24- mınýtta qos gol soǵyp, qaıtadan esep teńesti.

Oıynnyń 44-mınýtynda ıÝlıýs Zýmpf soqqan shaıba Germanııaǵa jeńis alyp keldi.

Osylaısha Qazaqstan jastary qarsylasyna 3:4 esebimen jeńilip, birinshi dıvızıonǵa túsip qaldy. 

Qazaqstan jastar quramasy joǵary dıvızıonda toǵyz márte baq synady. Joǵary jetistigi – 1999 jyly altynshy oryn.

Qazaqstandyq hokkeıshiler B tobynda oıyn kórsetti.

Toptyq kezeńde olar Shvetsııadan 0:8, Chehııadan 2:14, Shveıtsarııadan 4:5, Slovakııadan 1:3 esebimen jeńilip, pleı-off satysyna shyǵa almaı qaldy.

Qazaqstan quramasynyń oıynshylar tizimi tómendegishe:

Qaqpashylar: Djohar Dýdarkıev, Vladımır Nıkıtın (ekeýi – «Snejnye barsy», MHL), Danıl Lytkın («Barys U18»)

Qorǵaýshylar: Roman Bolshedvorskıı, Aslan Júsipbekov, Sanjar Ibragım, Gleb Reshetko, Danıal Shaqshaqbaev, Mstıslav Shıpılın (barlyǵy – «Snejnye barsy», MHL), Danıla Belıakov («Torpedo», Óskemen), Beıbarys Orazov («Barys», KHL)

Shabýylshylar: Abzal Álibek («Fıladelfııa Rebels», NAHL), Ádil Beısembaev, Artýr Gross, Kırıll Kankın, Vladımır Korchagın, Kırıll Lıapýnov, Aleksandr Mıgýnov, Asanáli Rýslanuly, Nıkıta Sıtnıkov (barlyǵy – «Snejnye barsy», MHL), Aleksandr Kım («Bısmark Bobkets», NAHL), Davlat Nurkenov («Essıat U20», U20 SM-sarja), NAHL), Egor Levkovets (MHK «Barys»), Asanalı Sarkenov (Spokan Chıfs, WHL), Semen Sımonov («Barys»).