Qazaqstandyq jas ǵalymdarǵa halyqaralyq taǵylymdamadan ótý joldary túsindirildi
ASTANA. KAZINFORM — Almaty qalasynda XII Halyqaralyq ǵylymı-tájirıbelik «Ýran jáne sırek metaldar ónerkásibin damytý» konferentsııasy aıasynda Qazaqstan Respýblıkasy Ǵylym jáne joǵary bilim mınıstrligi janyndaǵy Jas ǵalymdar keńesiniń «Qazaqstan ǵylymyn damytýdaǵy jas ǵalymdardyń róli: ózekti máseleler men jańa múmkindikter» taqyrybyndaǵy dóńgelek ústeli ótti. Bul týraly «Halyqaralyq baǵdarlamalar ortalyǵy» AQ málim etti.
Kezdesýde negizgi spıkerlerdiń biri retinde «Halyqaralyq baǵdarlamalar ortalyǵy» AQ strategııa jónindegi basqarýshy dırektory Japakov Ilıas Asylbekuly sóz sóılep, qazaqstandyq jas ǵalymdarǵa arnalǵan halyqaralyq ǵylymı taǵylymdamalar men «Bolashaq» baǵdarlamasynyń múmkindikterin tanystyrdy.
Іs-shara otandyq ǵylymı qaýymdastyq ókilderin, jas zertteýshilerdi, sarapshylardy jáne ǵylymı uıym basshylaryn bir alańǵa jınap, Qazaqstan ǵylymyn damytý perspektıvalaryn, halyqaralyq akademııalyq yntymaqtastyqty keńeıtý jáne jas ǵalymdardy qoldaý tetikterin talqylaýǵa arnaldy.
Dóńgelek ústel moderatory retinde Ómirǵalı Armanbek Qasymuly — Qazaqstan Respýblıkasy Ǵylym jáne joǵary bilim mınıstrligi janyndaǵy Jas ǵalymdar keńesiniń tóraǵasy, PhD dárejesiniń ıegeri qatysty. Sonymen qatar talqylaýǵa ǵylymı jáne bilim berý uıymdarynyń, zertteý ortalyqtarynyń jáne halyqaralyq jobalardyń ókilderi qatysty.
Halyqaralyq baǵdarlamalar ortalyǵy» AQ strategııa jónindegi basqarýshy dırektory Ilıas Japakov «Ǵylymı taǵylymdamalar jáne „Bolashaq“ halyqaralyq stıpendııasy: Qazaqstannyń jas ǵalymdary úshin basymdyqtar men perspektıvalar» taqyrybynda baıandama jasady.
Óz sózinde ol jas ǵalymdardy qoldaýdyń qoldanystaǵy tetikterin, álemniń jetekshi ǵylymı jáne bilim berý ortalyqtarynda taǵylymdamadan ótý múmkindikterin, sondaı-aq halyqaralyq ǵylymı áriptestikti damytý baǵyttaryn keńinen atap ótti. Sonymen birge «Ǵylymı taǵylymdamalar» baǵdarlamasyndaǵy jańartýlar, sheteldik uıymdarmen tikeleı baılanys ornatý jáne konkýrstyq irikteý úderisiniń erekshelikteri jóninde aqparat berildi.
Sondaı-aq qatysýshylarǵa úmitkerlerge qoıylatyn talaptar, qajetti qujattar tizimi jáne taǵylymdamadan ótýge daıyndyq kezeńderi túsindirildi. Budan bólek, «Bolashaq» halyqaralyq baǵdarlamasy aıasynda kásibı taǵylymdamadan ótýge múmkindik beriletin mamandar sanaty da tanystyryldy.
«Halyqaralyq baǵdarlamalar ortalyǵy» AQ derekterine sáıkes, qazirgi ýaqytta «Ǵylymı taǵylymdamalar» baǵdarlamasyna shamamen 1,2 myń qazaqstandyq ǵalym qatysyp, álemniń jetekshi ǵylymı jáne bilim berý ortalyqtarynda tájirıbeden ótken.
Jıynǵa qatysýshylar halyqaralyq ǵylymı yntymaqtastyqtyń keńeıýi men taǵylymdama baǵdarlamalarynyń damýy jas ǵalymdardyń kásibı ósýine jańa múmkindikter ashyp, Qazaqstannyń ǵylymı áleýetin nyǵaıtýǵa yqpal etetinin atap ótti.
Aıta keteıik, buǵan deıin Qazaqstan men Michigan State University akademııalyq yntymaqtastyqty keńeıtetinin jazdyq.
