Qazaqstandyq jas fýtbolshy «Barselona» quramyna qosyldy
ASTANA.KAZINFORM — Qazaqstandyq 15 jastaǵy fýtbolshy Karım Mendıkanov Ispanııanyń «Barselona» komandasymen kelisimshartqa qol qoıdy.
Bul jóninde sol eldiń belgili basylymy — Mundo Deportivo málim etti.
— Ispanııalyq balalar men jasóspirimder fýtboly halyqaralyq deńgeıde talanttardyń magnıti retinde qala beredi. Qazir nazar aýdara bastaǵan esimniń biri — Karım Mendıkanov. Qazaqstanda 2011 jyly dúnıege kelgen jas fýtbolshy «Barselonamen» kelisimshartqa qol qoıyp, aldaǵy maýsymda klýbqa qosylady, — dep jazylǵan portalda.
Basylymnyń habarlaýynsha, qazaqstandyq fýtbolshy Ispanııaǵa 2022 jyly kelgen. Sol ýaqyttan beri katalondyq fýtbol mektebinen tálim alyp keledi. Ótken jyldan beri «Serdanola» komandasy sapynda katalondyq lıgada oıyn kórsetti. Nátıjesinde óziniń qabilet deńgeıi joǵary ekenin dáleldep, joǵary sapaly oıyn sheberligimen kópshilik kózine tústi.
Al bıyl «San-Kýgat» sapynda mańyzdy fýtbolshylar qatarynan oryn ala bildi.
Aıta ketsek, budan buryn qazaqstandyq «Aqtóbe» komandasy slovakııalyq maman Shtefan Tarkovıchpen kelisimshartqa qol qoıdy.
