Qazaqstandyq jas AQSh-taǵy bedeldi kóshbasshylyq baǵdarlamasyna qabyldandy
ASTANA. KAZINFORM – Qazaqstandyq kásipker, SmartestPrep bilim berý startapynyń negizin qalaýshy Laýra Vaıgorova kásibı jáne kóshbasshylyq qabiletterdi damytýǵa arnalǵan CAMCA Fellowship 2026 halyqaralyq baǵdarlamasynyń qatysýshysy atandy.
Atalǵan baǵdarlamaǵa Ortalyq Azııa, Kavkaz, Mońǵolııa jáne Aýǵanstan elderin biriktiretin CAMCA óńirinen nebári 12 jas kóshbasshy irikteledi. Bıyl Laýra Vaıgorova Qazaqstannan tańdalǵan jalǵyz qatysýshy boldy.
Aıta keterligi, qazaqstandyq kásipker bul múmkindikke ekinshi talpynysynda qol jetkizgen. Alǵashqy ótinimi maquldanbaǵanymen, ol qaıtadan qujat tapsyryp, irikteýden sátti ótken.
– Bes apta boıy qatysýshylar Vashıngtonda bolyp, memlekettik organdardyń ókilderimen, saıasatkerlermen, jýrnalıstermen, zertteýshilermen, halyqaralyq uıymdar men bıznes kóshbasshylarymen kezdesedi. Baǵdarlama AQSh-tyń memlekettik jáne jekemenshik sektorlarynyń jumysymen jaqyn tanysýǵa, halyqaralyq úzdik tájirıbelerdi zerdeleýge jáne túrli deńgeıde sheshim qabyldaıtyn tulǵalarmen tikeleı tájirıbe almasýǵa múmkindik beredi, – deıdi Laýra Vaıgorova.
CAMCA Fellowship baǵdarlamasy AQSh-tyń burynǵy Qorǵanys mınıstri, memleket qaıratkeri Donald Ramsfeld negizin qalaǵan Rumsfeld Foundation qorynyń qoldaýymen júzege asyrylady.
Baǵdarlamanyń negizgi maqsaty – CAMCA óńirindegi bolashaǵynan úmit kúttiretin kóshbasshylardy biriktirý, uzaqmerzimdi kásibı baılanys qalyptastyrý jáne óńir men AQSh arasyndaǵy yntymaqtastyqty nyǵaıtý.
Joba óz eliniń damýyna úles qosyp júrgen ári halyqaralyq deńgeıdegi bastamalardy júzege asyratyn jas mamandarǵa arnalǵan.
– Baǵdarlama tek Vashıngtondaǵy jumyspen shektelmeıdi. Qatysýshylar AQSh-tyń taǵy eki iri qalasyna baryp, jergilikti bılik organdarynyń, bıznes qaýymdastyqtarynyń jáne qoǵamdyq ınstıtýttardyń qyzmetimen tanysady. Bul eldiń astanadan tys óńirlerindegi ómirdi de jan-jaqty túsinýge múmkindik beredi, – deıdi Laýra Vaıgorova.
Uıymdastyrýshylardyń málimetinshe, CAMCA Fellowship túlekteri úshin bul baǵdarlama jańa kásibı múmkindikterge, halyqaralyq seriktestikke jáne ortaq jobalarǵa jol ashady.
SmartestPrep bilim berý platformasynyń negizin qalaýshy retinde Laýra Vaıgorova shetelde bilim alǵysy keletin jastarmen jumys isteıdi. Onyń aıtýynsha, baǵdarlamaǵa qatysý óńirdegi kóshbasshylarmen tájirıbe almasýǵa, jańa baılanystar ornatýǵa jáne Qazaqstandaǵy bilim berý bastamalaryn damytýǵa tyń ıdeıalar ákelýge múmkindik beredi.
Baǵdarlama aıaqtalǵannan keıin qatysýshylar CAMCA Network túlekter qaýymdastyǵynyń quramyna kirip, halyqaralyq jobalar men jańa bastamalardy birge júzege asyrýdy jalǵastyrady.
Aıta keteıik, qazaqstandyq oqýshylar Eýropany baǵyndyrdy: 9 qatysýshynyń bári júldeger atandy.
