Qazaqstandyq zeınetker 5 myń shaqyrymdy velosıpedpen júrip ótip Parıjge jetti
PARIJ. KAZINFORM — Týrızm jáne sport mınıstri Qazaqstannyń Parıjdegi elshiliginde velosaıahatshy Rábbim Borashevpen kezdesti.
Velosaıahatshynyń sapary Frantsııadaǵy «Saltanatty arkada» (Trıýmfalnaıa arka) márecine jetti.
Ony Frantsııadaǵy Qazaqstan Elshiliginiń ujymy men frantsýz qoǵam qaıratkerleri saltanatty túrde qarsy aldy.
Vedomstvo basshysy Mańǵystaý oblysynyń turǵynyn Qazaqstan elshiliginde qoshemetpen qarsy alyp, velosıpedshiniń sporttyq daıyndyǵy men erik-jigerin erekshe atap ótti.
Ol 5 myń shaqyrymnan astam qashyqtyqty júrip ótip, sportshylarymyzdy qoldaý úshin Olımp oıyndaryna arnaıy keldi.
«Olımpıadaǵa barý — armandarymnyń biri edi. Jas kúnimde armanymdy júzege asyrýǵa múmkindigim bolmady, alaıda bıyl sonyń sáti túsip tur eken. Jańbyrǵa tótep berý, shekaradan jáne qala arqyly ótýge ýaqyt pen shydam qajet, biraq men óz degenime jettim», — dedi Rábbim Borashev.
Velosıpedshi aldymen Aqtaýdan Bakýge, sodan keıin Grýzııa arqyly maýsymda Túrkııaǵa jetken.
Ári qaraı Majarstan, Aýstrııa jáne Germanııa arqyly Parıjge tabany tıdi.
Rábbim Borashev zeınet jasyna deıin qurylys salasynda jumys istegen.
Keıingi jyldary velosportpen turaqty aınalysyp, birneshe ret jarystarǵa da qatysyp úlgergen.
Borashev velosherýdi uıymdastyrýǵa qoldaý kórsetip, kómegin aıamaǵan barsha otandasymyzǵa alǵysyn jetkizdi.
