Qazaqstandyq zeınetaqysynyń az eseptelgenin sotta dáleldep, jeńip shyqty
KAZINFORM — Oral turǵyny zeınetaqy tólemderin qaıta eseptetip aldy. Ol úshin sotqa júgingen. Bul týraly Joǵarǵy sottyń baspasóz qyzmeti habarlady.
Eki jyl buryn 65 jastaǵy qazaqstandyq zeınetke shyqqan. Oǵan aı saıynǵy tólem 2020 jyldyń mamyrynan 2023 jyldyń sáýirine deıingi kezeńdegi ortasha aılyq tabys negizinde taǵaıyndalǵan.
Keıinnen zeınetker jumys berýshisiniń Biryńǵaı jınaqtaýshy zeınetaqy qoryna birneshe aı boıy mindetti zeınetaqy jarnalaryn keshiktirip aýdarǵanyn bilgen. Osyǵan baılanysty ol zeınetaqy mólsherin qaıta qaraý týraly ótinish jasaǵan. Alaıda ýákiletti organ oǵan bas tartqan. Sebebi er adam ózi tıimdi dep sanaǵan úsh jyldyq kezeńdi tańdaǵan, sondyqtan dál sol ýaqyt esepteýdiń negizi retinde qabyldanǵan.
— Alaıda bastapqy tańdalǵan kezeń boıynsha júrgizilgen esepteý zeınetaqy jarnalaryn azaıtyp kórsetti, bul jalpy taǵaıyndalǵan tólem mólsherine eleýli áser etti. Bas tartýmen kelispegen azamat sotqa júgindi, — delingen habarlamada.
Birinshi satydaǵy sot talapty qanaǵattandyryp, ýákiletti organdy birqatar sebepke baılanysty talapkerdiń buzylǵan quqyqtaryn qalpyna keltirýge mindettedi.
— Talapker 20 jyl boıy úzdiksiz avtokólik kásipornynda júrgizýshi bolyp jumys istegen jáne tolyq kólemde jasyna baılanysty zeınetaqy alýǵa quqyly. Jumys berýshiniń zeınetaqy jarnalaryn ýaqytynda aýdarmaýy ótinish berýshiniń quqyqtaryn shekteýge negiz bolmaýy tıis. 2023 jyly zeınetaqy taǵaıyndalǵan sátte ýákiletti organǵa onyń sáýir–tamyz 2023 jylǵy tabysy men aýdarymdary belgili bolǵan. Demek, qaıta esepteýden bas tartý zeınetkerdiń zańdy quqyqtary men múddelerin shekteıdi. Ótinish berýshi kórsetken 2020 jyldyń qyrkúıeginen 2023 jyldyń tamyzyna deıingi kezeń zeınetaqy mólsherin esepteý úshin eń qolaıly bolyp tabylady jáne ol ýákiletti organ tarapynan eskerilýge tıis edi, — dep túsindirdi sotta.
Apellıatsııalyq saty isti qarap, ýákiletti organ ótinishti formaldy túrde qaraǵanyn jáne talapkerdiń quqyqtaryn qorǵaýdy qamtamasyz etpeı, zań talaptaryn buzǵanyn atap ótti.
Batys Qazaqstan oblystyq soty birinshi saty sotynyń sheshimimen kelisti. Joǵarǵy sot ta sot aktilerin ózgerissiz qaldyrdy.