Qazaqstandyq zaýyt Louis Vuitton jáne Gucci brendine toqyma ónimderin jetkizedi
ASTANA. KAZINFORM — Túrkistan oblysynda salynýy josparlanǵan maqta-toqyma klasteriniń ónimderi lıýks brend óndirýshilerine jetkizilmek. Bul týraly Kazinform agenttiginiń QR Syrtqy ister mınıstrligine joldaǵan resmı saýal jaýabynda aıtylǵan.
Álemdik brendterdiń Qazaqstanǵa kelýi — sheteldik ınvestorlarmen jumys isteıtin ýákiletti organdardyń, atap aıtqanda Syrtqy ister mınıstrligi men «Kazakh Invest» ulttyq kompanııasynyń basym baǵyttarynyń biri.
— Degenmen, jumystyń birinshi mindeti — óndiriske ınvestıtsııa tartý jáne jańa qýat qurý, onyń ishinde brendtik ónim shyǵaratyn kásiporyndardy iske qosý jáne bolashaqta olardyń saýda ókildikteri men ortalyqtaryn elimizde ashý, — dep atap ótti vedomstvodan.
Syrtqy ister mınıstrligi sán ındýstrııasy salasyna baǵyttalǵan Túrkistan oblysynda maqta-toqyma klasterin salý boıynsha Qytaıdyń Lihua kompanııasymen jasalǵan kelisimdi atady.
— Josparǵa sáıkes, onyń ónimderi Louis Vuitton jáne Gucci sekildi lıýks brend óndirýshilerine de jetkiziledi. Bul Qazaqstannyń birtindep jahandyq óndiristik-saýda tizbeginiń bir bóligine aınalyp kele jatqanynyń aıqyn kórinisi. Álemdik óndirýshilerdiń Qazaqstan naryǵyna degen qyzyǵýshylyǵy artyp keledi, — delingen resmı jaýapta.
Jobanyń maqsaty — maqtany ósirýden bastap, daıyn toqyma ónimin (jip, mata, kıim jáne t. b.) shyǵarýǵa deıingi tolyq tsıkldi qamtıtyn maqta agroónerkásiptik keshenin qalyptastyrý.
Egis alqaptaryna 50 myń gektardan astam jer bólindi. 10 zaýyt salý josparlanǵan, onyń tórteýi egis alqaptardyń mańynda maqtany óńdeýge, ekeýi zamanaýı sý únemdeý tehnologııasyn qoldanatyn tamshylap sýarý júıesin damytýǵa jáne tórteýi toqyma óndirisine, sonyń ishinde tigin jáne boıaý-bezendirý fabrıkasyna arnalǵan.
Jyl basynda Syrtqy ister mınıstriniń orynbasary Álibek Qýantyrov Qazaqstan naryǵyna kóptegen álemdik brend kelip jatqanyn aıtqan edi.