Qazaqstandyq zańger Shymbulaq taý shańǵysy ákimshiligin sotqa bermek
ALMATY. KAZINFORM – Qazaqstandyq zańger Djohar Ótebekov «Shymbulaq» taý shańǵysy kýrorty ákimshiligin sotqa bermek. Bul týraly ol óziniń Facebook –tegi paraqshasynda jazdy.
Aıtýynsha, onyń jubaıy Qundyz Ótebekovany Shymbulaqta shańǵy teýip júrgen kezinde snoýbordshylar eki ret qaǵyp ketken. Saldarynan áıeli qulap, jaraqat alǵan.
«Kez kelgen kýrorta qaýipsizdikti durys saqtamaǵandardy shańǵy bıletinen jáne taý baýraılaryna kirý quqyǵynan aıyrylady. Biraq Shymbulaq ákimshiligi kinálilerdi izdeýge de tyryspady. Snoýbordshylar da qashyp ketti. Biz Shymbulaqty mindetti túrde sotqa beremiz» – dep jazdy ol.
«Shymbulaq» taý shańǵy kýrortynyń dırektory Rınat Ábdirahmanov atalǵan jaǵdaıǵa baılanysty túsinik berdi.
«26 qańtar kúni saǵat 15:13-te jedel ortalyqqa Talǵar tas jolynyń joǵarǵy bóliginde syrǵanýshylardyń soqtyǵysqany týraly aqparat tústi.Zardap shekken adamdy evakýatsııalaý úshin kórsetilgen jerge shańǵy patrýldik qyzmeti jiberildi. Qutqarýshylar alǵashqy aqparatty jınaý kezinde zardap shegýshi snoýbordshymen soqtyǵysqany belgili boldy. Alaıda ol oqıǵa ornynan qashyp ketken. 15:23-te jaraqat alǵan áıel medıtsınalyq pýnktke evakýatsııalandy. Oǵan qajetti alǵashqy medıtsınalyq kómek kórsetildi. Keshki saǵat 17:40-ta ol kýrorttan shyǵyp ketken», - dedi ol.
Ábdirahmanovtyń aıtýynsha, qazir kýrorttyń jedel shtaby zardap shegýshimen baılanysta.
«Beınebaqylaý kameralarynyń kómegimen kúdikti úsh adam anyqtaldy.Tártip buzýshylar qalalyq jalǵa berý qyzmetterin paıdalanǵan. Qazirgi ýaqytta olardyń kim ekenin bilý úshin polıtsııaǵa qosymsha materıaldar usynylýda»,- dep atap ótti.
