Qazaqstandyq voleıbolshylar tartysty matchta Taıland quramasyn utty

ASTANA. KAZINFORM – Isa-Taýnda (Bahreın) voleıboldan erler quramalary arasynda ótip jatqan «AVC shaqyrý kýbogi» týrnırinde jarystyń ekinshi kúni Qazaqstan komandasy Taılandty tize búktirdi.

V tobynda keshe Pákstan quramasyna 0:3 (19:25, 19:25, 21:25) esebimen jol bergen oraldyq maman Vıktor Kozıktiń shákirtterine sheginer jol joq edi. Eger osy jarystyń ótken jylǵy chempıony Taılandtan jeńilip qalǵan jaǵdaıda qazaqstandyqtarǵa tek 9-12 oryndar úshin talasýǵa týra keletin.

Bas bapker bul joly komanda kapıtany, Oral voleıbolynyń túlegi Vıtalıı Vorıvodınge qosa Aıbat Netalın, Nodırhan Qadyrhanov, Petr Chýrzın, Nurlybek Nurmahambetov (baılanystyrýshy), Damır Ákimov, Erikjan Bókenge (lıbero) senim artty. Arasynda Asqar Serik sııaqty voleıbolshylar da qosyldy.

Birinshi partııada qazaqstandyqtar 25:21 esebimen basym tússe, ekinshisinde taılyqtar ese qaıyrdy – 25:22. Úshinshisinde Qazaqstan qaıta alǵa shyqty – 25:23. Tórtinshi sette Taıland des bermedi – 25:19. Degenmen besinshi partııada Oral voleıbolynyń taǵy bir túlegi P.Chýrzın oıyn núktesin qoıdy – 15:13.

Osylaısha, Qazaqstan quramasy mańyzdy 2 upaıǵa qol jetkizdi. V tobynda pákstandyqtar 6 upaımen alda tur. Qytaıda ótken Azııa oıyndarynda Pákstan úzdik bestikke ilikse, qazaqstandyqtar 9-oryn úshin básekede taılyqtardy utqan edi.

«AVC shaqyrý kýboginiń» jeńimpazy «Segizdik fınalyna» joldama alady. Al «Segizdik fınalynda» Ulttar lıgasynyń bir ǵana joldamasy sarapqa salynady.

Ótken jyly Taıbeıde osy dodada alǵash ret óner kórsetken Qazaqstan quramasy 14 qatysýshynyń ishinen 7-orynǵa ilikken edi.

Eske sala keteıik, budan buryn voleıboldan Qazaqstan áıelder quramasynyń Fılıppındegi jarystyń fınalyna joldama alǵanyn jazǵan bolatynbyz.

Bul týrnırde qazaqstandyq qyzdar sońǵy básekede taǵy da Vetnamǵa ese jiberip, ekinshi oryndy qanaǵat tutqan edi.