Qazaqstandyq voleıbolshylar Azııa chempıonatyndaǵy ónerin aıaqtady
ASTANA. KAZINFORM — Qytaıdyń Tıantszın qalasynda voleıboldan áıelder arasynda Azııa chempıonatynyń toptyq kezeńi aıaqtaldy.
Qazaqstan quramasy V tobynda óner kórsetti. Úsh matchtyń qorytyndysy boıynsha qazaqstandyq voleıbolshylar bir jeńiske jetip, eki ret jeńilip, óz tobynda úshinshi orynǵa turaqtady.
Týrnır talaptaryna sáıkes, ár toptan úzdik eki komanda, sondaı-aq, úshinshi oryn alǵan quramalar arasyndaǵy kórsetkishi joǵary eki komanda shırek fınalǵa joldama aldy. Qazaqstan quramasy olardyń qataryna ene almaı, júlde úshin talasty jalǵastyra almady.
Azııa chempıonatynyń qorytyndysy boıynsha Qazaqstan quramasy toǵyzynshy orynǵa ıe boldy.
Qytaı, Taıland, Indonezııa, Japonııa, Vetnam, Qytaı Taıbeıi, Ońtústik Koreıa jáne Iran quramalary júldege talasady.
Eske salaıyq, buǵan deıin Jánııa Bekmuhambetova ústel tennısinen Horvatııadaǵy týrnırde ekinshi oryn alǵanyn habarlaǵan edik.
