Qazaqstandyq veloshabandoz Ramıs Dinmuhametov Gonkongtaǵy jarysta jeńimpaz atandy
ASTANA. KAZINFORM — Gonkong qalasynda (QHR) velotrekten Hong Kong International Track Cup halyqaralyq týrnıri ótip jatyr.
Sportty damytý dırektsııasynan málim etkenindeı, 68 elden 304 veloshabandoz jınalǵan álemdik dodada ulttyq qurama sportshysy Ramıs Dinmuhametov omnıým baǵdarlamasynda máre syzyǵyn birinshi bolyp qıyp, altynnan alqa taqty.
R.Dinmuhametov 136 upaı jınady. Aýstrııa sportshysy Konor Lıhı (127 upaı) ekinshi, japonııalyq Kanta Ýmezaýa (106 upaı) úshinshi orynǵa ıe boldy.
Sondaı-aq komandalyq sprıntte Qazaqstan erler quramasy (Danııar Shaıahmetov, Kırıll Kýrdıdı, Ramazan Muhtar) kúmiske qol jetkizdi.
Keırın baǵdarlamasynda baq synaǵan otandastarymyz Andreı Chýgaı 9-shy, Danııar Shaıahmetov 12-shi, Kırıll Kýrdıdı 17-orynnan kórindi.
Eske sala keteıik, budan buryn Mılad Karımıdiń álem kýbogy kezeńinde úzdik shyqqanyn jazǵan bolatynbyz.