Qazaqstandyq uıymdar Horizon Europe baǵdarlamasynan 2 mln eýroǵa jýyq qarjy tartty
ASTANA. KAZINFORM – Qazaqstandyq uıymdar sońǵy bir jylda Eýropalyq odaqtyń Horizon Europe baǵdarlamasy aıasynda 1,77 mln eýroǵa jýyq qarjy tartty. Baǵdarlamaǵa qatysý úshin elimizdiń joǵary oqý oryndary, ǵylymı uıymdary men kompanııalary 200-ge jýyq ótinim bergen.
Bul týraly Astanada ótken Horizon Europe baǵdarlamasyna qatysýdy keńeıtýge arnalǵan aqparattyq sessııada aıtyldy.
Qazaqstandaǵy Horizon Europe baǵdarlamasynyń ulttyq úılestirýshisi Álııa Sembaevanyń aıtýynsha, qazaqstandyq uıymdar ǵylym men ınnovatsııanyń birneshe baǵyty boıynsha qarjylaı qoldaý alyp otyr.
– Baǵdarlamada irgeli ǵylym men ınnovatsııalyq jobalardan bastap, startaptar men jahandyq kompanııalarǵa deıin qarjylandyrý múmkindikteri bar. Qazir Qazaqstannyń sırek kezdesetin jer metaldaryna qatysty birqatar usynysy bar. Bıyl osy baǵytta eki kelisimge qol qoıyldy. Medıtsına men densaýlyq saqtaý salasyndaǵy qazaqstandyq uıymdar da qarjylandyrýǵa ıe boldy, – dedi Álııa Sembaeva.
Qazaqstandyq uıymdardyń baǵdarlamaǵa qyzyǵýshylyǵy sońǵy jyldary aıtarlyqtaı artqan. 2023 jyly nebári 15 ótinim berilse, 2026 jylǵy tamyzdyń sońyna qaraı olardyń sany 199-ǵa jetti.
Endi Qazaqstan Horizon Europe baǵdarlamasyna qaýymdasqan el retinde qosylýdy kózdep otyr. Osy maqsatta maýsym aıynda Eýropalyq komıssııaǵa resmı ótinim joldandy. Qazir taraptar rásimdik, quqyqtyq jáne qarjylyq máseleler boıynsha konsýltatsııalar júrgizip jatyr.
Aıta keteıik, baǵdarlamaǵa qosylý qazaqstandyq joǵary oqý oryndary, ǵylymı uıymdar men kompanııalardyń iri halyqaralyq ǵylymı-zertteý jáne ınnovatsııalyq jobalarǵa qatysý múmkindigin keńeıtedi.
Buǵan deıin jas ǵalymdar taǵylymdamadan ótetin sheteldik ýnıversıtetter tizimi keńeıtiletini týraly jazǵan edik.
