Qazaqstandyq ústel tennısshileri Tashkenttegi WTT Feeder týrnırinde kúmis júlde jeńip aldy
ASTANA. KAZINFORM – Qazaqstan quramasynyń ókilderi Kırıll Gerasımenko men Iskender Harkı Ózbekstannyń Tashkent qalasynda ótken WTT Feeder halyqaralyq týrnırinde kúmis júldege ıe boldy, dep habarlaıdy Ulttyq olımpıada komıteti.
Qazaqstandyq sportshylar erler arasyndaǵy juptyq synda fınalǵa deıin sátti óner kórsetti.
Týrnır barysynda Kırıll Gerasımenko men Iskender Harkı Frantsııa ókilderi Esteban Dorr men Florıan Býrrassony 3:2 esebimen jeńdi. Keıin Ózbekstannyń Shohrýh Iskandarov pen Kýtbıdıllo Teshaboev jubynan 3:0 esebimen basym tústi.
Jartylaı fınalda olar Reseı tennısshileri Denıs Ivonın men Nıkıta Artemenkony 3:1 esebimen utty.
Fınalda qazaqstandyqtar Reseı quramasynyń ókilderi Maksım Grebnev pen Lev Katsmanǵa 0:3 esebimen ese jiberip, týrnırdiń kúmis júldesin enshiledi.
Osyǵan deıin semserlesýden Qazaqstan erler komandasy álem chempıonatynyń fınalyna shyǵyp, tarıhı nátıje tirkegeni týraly jazdyq.
