Qazaqstandyq ýnıversıtetter NVIDIA baǵdarlamalary negizinde JI mamandaryn daıarlaýdy keńeıtedi
ASTANA. KAZINFORM — Qazaqstan Respýblıkasynyń Ǵylym jáne joǵary bilim mınıstrligi NVIDIA kompanııasymen Deep Learning Institute (DLI) baǵdarlamasy aıasynda yntymaqtastyq ornatqan. Baǵdarlama oqytýshylardy daıarlaýǵa jáne sertıfıkattaýǵa, sondaı-aq stýdentterdiń jasandy ıntellekt salasyndaǵy quzyretterin damytýǵa baǵyttalǵan.
2026 jylǵy 23 qazanda NVIDIA kompanııasynyń negizin qalaýshysy ári bas atqarýshy dırektory Djensen Hýangtyń Qazaqstanǵa sapary aıasynda yntymaqtastyqty keńeıtý qajettiligi atap ótilip, elimizde óńirlik NVIDIA Physical AI Hub ortalyǵyn qurý usynyldy. Bul bastama fızıkalyq jasandy ıntellekt salasynda kadrlar daıarlaý jáne qoldanbaly sheshimderdi damytý maqsatynda ýnıversıtetter men ónerkásiptik seriktesterdiń kúsh-jigerin biriktirýdi kózdeıdi.
Birinshi kezeńde Qazaqstannyń joǵary oqý oryndaryna NVIDIA DLI kýrstaryna, oqý materıaldaryna jáne sertıfıkattaýdy qamtıtyn praktıkalyq sabaqtarǵa qoljetimdilik berý usynylady. Baǵdarlama aıasynda oqytýshylardy tegin sertıfıkattaý jáne akademııalyq qaýymdastyqqa arnalǵan oqý semınarlaryn ótkizý qarastyrylǵan. Daıarlyqtan ótken oqytýshylar óz ýnıversıtetterinde stýdentterdi oqyta alady. Bastamanyń tehnıkalyq negizi retinde joǵary oqý oryndarynyń qoldanystaǵy ınfraqurylymy men qoljetimdi bulttyq esepteý resýrstaryn paıdalaný josparlanýda.
Bastamany kezeń-kezeńimen iske asyrý kózdelýde. Alǵashqy kezeńde joǵary oqý oryndarynyń NVIDIA DLI baǵdarlamasyna qoljetimdiligin qamtamasyz etý, oqytýshylardy daıarlaý jáne sertıfıkattaý josparlanýda. Keıin sertıfıkattalǵan mamandar óz ýnıversıtetterinde stýdentterge arnalǵan oqý kýrstary men praktıkalyq sabaqtardy uıymdastyra alady. Qoldanystaǵy ýnıversıtettik ınfraqurylym men qoljetimdi bulttyq esepteý resýrstaryn paıdalaný baǵdarlamanyń qamtý aıasyn birtindep keńeıtýge múmkindik beredi.
Aıta ketelik Qazaqstan JI ındýstrııasy NVIDIA-men áriptestikten ne utatyny týraly jazǵan edik.
