Qazaqstandyq Ulttyq ulan ofıtseri Reseıde balany ajal aýzynan qutqaryp qaldy
ASTANA. KAZINFORM - Reseıde QR Ulttyq ulan ofıtseri balany ajal aýzynan qutqaryp qaldy, – dep jazdy Polisia.kz.
Jaz mezgilinde, ókinishke qaraı, balalardyń terezeden qulaý jaǵdaılary jıi kezdesedi. Jazataıym oqıǵalar kóbinese ata-ana men jaqyndarynyń balaǵa jiti nazar aýdarmaýy jáne oıyn balasyna senip tapsyrýy saldarynan bolyp jatady. Keıbir ata-analar moskıttik tordyń mundaı jaǵdaılarda qaýipsizdikti qamtamasyz ete almaıtynyn túsinbeıdi.
QR ІІM Ulttyq ulan ofıtseriniń qyraǵylyǵy men eptiligi Reseıde bolýy múmkin qaıǵyly oqıǵanyń aldyn aldy.
8 maýsymda saǵat 19:30 shamasynda podpolkovnık Jandos Nurahmetov balasymen Kostroma qalasynyń Galıchskaıa kóshesinde serýendep júrgende, №51 úıdiń 2-qabatynan 4-5 jastaǵy balany baıqaıdy. Ol terezeden oıynshyq, kıim, sómkelerdi laqtyryp jiberdi.
«Men ótip bara jatqan turǵyndardan tereze aldynda jalǵyz otyrǵan bala men onyń ata-anasy týraly suraı bastadym. Balaǵa ishke qaraı kir dep, qaýipti túsindirmek boldym. Alaıda balaqaı qulaq asa qoımady. Sol mańda turatyn bir áıel kelip, bul balanyń densaýlyǵynda kináraty bar ekenin aıtty. Osy ýaqytta bala tereze arqaýyna asylyp, syrtqa shyǵýǵa umtyldy. Onyń qulap ketetinin sezip, bar daýsymmen aıqaılaı bastadym. Úı ishinde eresek adam bolsa, daýysty estisin dep. Alaıda oılanyp, bireýdiń shyqqanyn kútip turatyn artyq ýaqyt bolmady. Dereý qubyr arqyly 2-qabatqa kóterilip, balany aqyryn terezege súırep apardym. Balamen birge páterge kirip, úıde eshkim joq ekenin túsindim. Men ketsem, taǵy qaıtalap júrer dep balaqaıdy kóshege alyp shyǵyp, ata-anasyn jaqsy tanıtyn kórshilerine tapsyrdym», – deıdi ulandyq ofıtser.
Aıta keteıik, Jandos Nurahmetov búginde Reseı Federatsııasynyń Kostroma qalasynda Keńes Odaǵynyń marshaly S.K.Tımoshenko atyndaǵy radıatsııalyq-hımııalyq jáne bıologııalyq qorǵaý áskerı akademııasynyń tyńdaýshysy. Ulandyq ofıtser úılengen, bir jarym jasar uly bar.
Qazirgi ýaqytta Qazaqstannan joǵaryda atalǵan akademııada alty kýrsant, eki tyńdaýshy jáne bir adıýnkt bilim alyp jatyr. 2022 jyly Qazaqstan Respýblıkasy Ulttyq ulanynyń Almaty oblysynyń Qarakemer kentindegi 6654 áskerı bóliminen atalǵan bilim ordasyna oqýǵa túsken. Dáris bir aıdan keıin aıaqtalady.
