Qazaqstandyq túıe súti Taıaý Shyǵys naryǵyna shyǵýy múmkin
ASTANA.KAZINFORM — Qazaqstanda ǵylymı zertteýler negizinde pasterlengen túıe sútine arnalǵan standart ázirlendi. Bul otandyq ónimdi Taıaý Shyǵys elderine eksporttaýǵa múmkindik beredi. Jańa standart boıynsha ónim sapasyna qoıylatyn talaptar qatańdatylyp, qazaqstandyq óndirýshilerdiń básekelestik artyqshylyǵyn arttyrý kózdelgen.
QR Saýda jáne ıntegratsııa mınıstrligi Tehnıkalyq retteý jáne metrologııa komıteti tóraǵasynyń orynbasary Aleksandr Razzarenovtyń aıtýynsha, elimizde saýmalǵa arnalǵan standart burynnan bekitilgen. Al bıyl ǵylymı zertteýlerdiń nátıjesinde pasterlengen túıe sútine arnalǵan standart ázirlengen.
— Bizde saýmalǵa arnalǵan standart burynnan bar. Bıyl ǵylymı zertteýler negizinde pasterlengen túıe sútine arnalǵan standart ázirledik. Bul ónimdi Taıaý Shyǵys elderine eksporttaýǵa múmkindik beredi. Synaq nátıjeleri boıynsha otandyq ónimniń sapa kórsetkishteri saýda seriktesterimizdiń uqsas ónimderine qaraǵanda joǵary ekenin anyqtadyq. Endi sapa talaptary qatańdatylady. Tıisinshe, bul otandyq ónimniń básekege qabilettiligin arttyrady, — dedi Aleksandr Razzarenov Ortalyq kommýnıkatsııalar qyzmetinde ótken brıfıngte.
Sonymen qatar is-shara barysynda jýrnalıster shubatqa jeke standart engizile me jáne túıe súti ónimderine ortaq talaptar belgilene me degen saýal qoıdy.
QR Saýda jáne ıntegratsııa mınıstrligi Tehnıkalyq retteý jáne metrologııa komıteti tóraǵasynyń orynbasary Qanat Qabylbekovtiń túsindirýinshe, ázirge tamaq ónerkásibi baǵytynda pasterlengen túıe sútine qatysty standart qabyldanǵan. Aldaǵy ýaqytta osyndaı standarttardy ázirleý jáne olardyń talaptaryn engizý boıynsha jumystar jalǵasady.
— Tamaq ónerkásibi boıynsha, atap aıtqanda, pasterlengen túıe sútine qatysty osyndaı standart qabyldandy. Olardy odan ári ázirleý jáne sapa talaptaryn engizý baǵytyndaǵy jumystar jalǵasady, — dep tolyqtyrdy Qanat Qabylbekov.
Buǵan deıin qazaq fermeri túıe sharýashylyǵyn damytyp, jylyna 197 tonna sút óndiretinin jazǵan edik.
