Qazaqstandyq týroperatorlarǵa qosymsha salyq týraly habarlama jiberilip jatyr

ASTANA. KAZINFORM – Qazaqstandyq týroperatorlar shetelge demalýǵa jiberilgen týrısterdiń naqty sany boıynsha salyq organdarynan qosymsha salyq tóleý týraly habarlama alyp jatyr.

Búgin Úkimet otyrysynda otandyq týrızmdi damytý jáne tsıfrlandyrý máselesi qaraldy. Jıynnan keıin ótken baspasóz máslıhatynda týroperatorlar qyzmetine qatysty qosymsha salyq máselesi kóterildi.

Saýalǵa Týrızm jáne sport vıtse-mınıstri Erjan Erkinbaev jaýap berdi.

— Iá, mundaı keıs bar jáne biz bul másele boıynsha týrızm salasynyń ókilderimen de, Qarjy mınıstrligimen de birneshe ret sóılestik. Qarjy mınıstrligi túsinistik tanytyp otyr. Iá, habarlamalar jiberildi, sebebi Memlekettik kirister komıteti salyqty qaıta eseptep, týrızm sýbektileriniń salyqty ýaqtyly tólemegenin anyqtady. Basqasha aıtqanda, salyq tóleýden jaltarǵan. Bul jerde qylmystyq quram joq, tek qosymsha eseptelgen salyqqa tıisti áreket etýi tıis, ıaǵnı tóleý kerek, ne bolmasa quqyǵyn sotta qorǵaý qajet, — deıdi mınıstrdiń orynbasary.

Vıtse-mınıstrdiń málimdeýinshe, qosymsha salyqqa qatysty, árbir bıznes sýbektiniń máselesi jeke qaralady.

Buǵan deıin Erjan Erkinbaev avtojoldar boıyndaǵy jáne dalalyq jerlerdi ájethana ornatý máselesine qatysty pikir bildirgen edi. 

Úkimet otyrysynda belgili bolǵandaı, elimizde týrısterge arnalǵan, jasandy ıntellektige negizdelgen TravelStan mobıldi qosymsha ázirlenedi.