Qazaqstandyq týroperatorlar Ázerbaıjannyń emdik-saýyqtyrý týrızmimen tanysty
ASTANA. KAZINFORM — Qazaqstan, Reseı, Belarýs jáne Ózbekstannyń týrıstik kompanııalarynyń 30-dan astam ókili Ázerbaıjanǵa uıymdastyrylǵan tanystyrý týryna qatysty, dep habarlaıdy Kazinform agenttiginiń Bakýdegi menshikti tilshisi Ázerbaıjan týrızm bıýrosyna silteme jasap.
Bul sapar Ázerbaıjannyń medıtsınalyq jáne saýyqtyrý qyzmetterin shetelde keńinen tanytýǵa, sondaı-aq sheteldik týroperatorlarmen iskerlik baılanys ornatýǵa baǵyttalǵan.
Baǵdarlamada óńirlerdegi saýyqtyrý týrızminiń múmkindikterine erekshe nazar aýdaryldy. Qatysýshylar Baký, Lenkoran, Naftalan, Shekı jáne Gabala qalalaryn aralap, qonaqúılerdiń, kýrorttyq keshenderdiń, SPA ortalyqtary men saýyqtyrý mekemeleriniń ınfraqurylymymen tanysty.
Budan bólek Naftalan qalasyna da arnaıy sapar uıymdastyryldy. Qala emdik qasıeti bar munaıdy saýyqtyrý rásimderinde paıdalanýymen erekshelenedi. Al Bakýde týrıstik kompanııalardyń ókilderi Kaspıı teńiziniń jaǵalaýyndaǵy kýrorttyq keshendi aralap, jaǵajaı demalysynyń múmkindikteri men qonaqúı ınfraqurylymyn kórdi.
Sondaı-aq delegatsııa Bakýde ótken saýyqtyrý týrızmi jónindegi halyqaralyq konferentsııaǵa qatysty. Jıyn aıasynda Ázerbaıjannyń týrıstik sala ókilderimen B2B kezdesýleri uıymdastyrylyp, taraptar yntymaqtastyqty nyǵaıtý, týrıstik ónimderdi shetelde tanytý jáne jańa naryqtarǵa shyǵý múmkindikterin talqylady.
Qazaqstandyq týrıster sanynyń artýy Ázerbaıjannyń elimizdiń naryǵyna degen qyzyǵýshylyǵyn kúsheıtip otyr. Memlekettik týrızm agenttiginiń málimetinshe, 2026 jyldyń segiz aıynda Ázerbaıjanǵa 72 733-ten astam qazaqstandyq saparlaǵan. Bul byltyrǵy jyldyń osy kezeńimen salystyrǵanda 5 paıyz kóp.
Buǵan deıin Qazaqstan men Ázerbaıjannyń birlesken týroperatordy iske qosqany habarlanǵan bolatyn.
