Qazaqstandyq tóreshi 2026 jylǵy Azııa oıyndaryna resmı shaqyrtý aldy
ASTANA. KAZINFORM – Túrkistan oblysynyń eskek esý jáne jelkendi sport qaýymdastyǵynyń ókili Indıra Bektenova 2026 jyly Japonııada ótetin HH jazǵy Azııa oıyndaryna resmı túrde shaqyrtý aldy.
QR UOK málimetinshe, atalǵan qurlyqtyq dodada ol baıdarka men kanoede esý sportynan halyqaralyq tehnıkalyq tóreshi (ITO) retinde qyzmet atqarady.
Indıra Bektenova osy sport túrinde Qazaqstannan shyqqan alǵashqy halyqaralyq sanattaǵy áıel tóreshi retinde tarıhta qaldy.
– Men úshin Qazaqstan atynan iri halyqaralyq jarystarda el namysyn qorǵap, áıelder arasynda halyqaralyq sanatqa ıe bolǵan alǵashqy qazaq tóreshi ataný - úlken mártebe. Bul - kópjyldyq eńbektiń, halyqaralyq tájirıbeniń jáne álemdik sport uıymdarynyń seniminiń nátıjesi. Aldaǵy ýaqytta da kásibı tóreshilikti damytýǵa jáne Qazaqstannyń halyqaralyq sport arenasyndaǵy ornyn nyǵaıtýǵa úles qosamyn, - dedi Indıra Bektenova.
Sondaı-aq ol Vengrııanyń Seged qalasynda ótetin baıdarka men kanoede esýden álem kýbogi kezeńinde Halyqaralyq baıdarka men kanoede esý federatsııasy (ICF) tóreshiler alqasynyń quramynda Finish Line Judge retinde jumys isteıdi.
Aıta keteıik, HH jazǵy Azııa oıyndary 2026 jyldyń 19 qyrkúıegi men 4 qazany aralyǵynda Japonııanyń Nagoıa qalasy men Aıtı prefektýrasynda ótedi. Jarys baǵdarlamasyna 41 sport túri (68 dıstsıplına) engen. Barlyǵy 460 júlde jıyntyǵy sarapqa salynady.
Aıta keteıik, qazaqstandyq eki maman halyqaralyq tennıs tóreshisi mártebesin aldy.