Qazaqstandyq tólqujat jańartyldy: eski pasportty ne isteý kerek

ASTANA. KAZINFORM — Qazaqstandyqtardyń tólqujatynda jańa qorǵanys elementi, ıaǵnı qar barysynyń sýreti paıda boldy. Osy oraıda azamattar eski tólqujatty aýystyrýy kerek pe? Bul saýalǵa Іshki ister mınıstrligi jaýap berdi.

— Qosymsha qorǵanys elementimen jańa úlgidegi tólqujat shyǵarý qoldanystaǵy eski tólqujattardy jappaı aýystyrýdy kózdemeıdi, ıaǵnı aýystyrý mindetti emes. Jańa úlgi engizilgenge deıin berilgen tólqujattar (jaramdylyq merzimi ótip ketken, búlingen, joǵalǵan nemese ıesiniń mártebesine sáıkes kelmeıtin jaǵdaıdy qospaǵanda) Qazaqstan Respýblıkasynyń zańnamasyna sáıkes, qoldanylý merzimi aıaqtalǵanǵa deıin kúshin saqtaıdy, — dep habarlady mınıstrlik.

Qar barysynyń beınesi bar tólqujattar bıyl 3 shildeden bastap berile bastady. 

2025 jylǵy 24 shildedegi jaǵdaı boıynsha, jańa qorǵanys elementimen 88 136 tólqujat daıyndalyp, onyń 55 882-si azamattarǵa berilgen.

Birneshe kún buryn qazaqstandyqtardyń tólqujatynda jańa qorǵaý elementi paıda bolatyny týraly jazǵan edik. 

Eske sala ketsek, bıyl Memleket basshysy Qasym-Jomart Toqaev Qazaqstan halqy Assambleıasynyń HHHІV sessııasynda «tólqujatymyzdyń abyroı-bedeliniń kóterilýi elimizdiń yqpaly kúsheıe túskenin kórsetedi», — degen edi.