Qazaqstandyq tólem kartalary shetelde jıi qoldanylyp jatyr

ASTANA. KAZINFORM — Bıyl qańtar-qyrkúıek aılarynda qazaqstandyq emıtentterdiń kartalary boıynsha shetelde 200 mıllıonǵa jýyq operatsııa júrgizilgen. Ótken jyldyń sáıkes kezeńimen salystyrǵanda 20,1 paıyzǵa artyq kórsetkish. Bul týraly Birinshi nesıe bıýrosy habarlaıdy. 

Operatsııalar kólemi teńge ekvıvalentinde shamamen 3,7 trln teńgeni qurady. Bul ótken jylǵy qańtar-qyrkúıek deńgeıinen nomınaldy túrde 28,6%-ǵa joǵary.
Dınamıkanyń negizgi úlesin qolma-qol emes tólemder, olardyń úlesi barlyq operatsııa boıynsha 98% (196,1 mln operatsııa) jáne jalpy somanyń 91%-yn (3,3 trln teńge) qurap otyr.

— Qolma-qol aqsha alý boıynsha operatsııalar jalpy úrdiske saı emes. Toǵyz aıdyń qorytyndysy boıynsha mundaı operatsııalardyń sany 8,3%-ǵa azaıyp, 3,9 mln-ǵa deıin túsken. Alaıda olardyń jalpy somasy ınflıatsııany eseptemegende 1,7%-ǵa ósip, 323,5 mlrd teńgege jetti. Nátıjesinde bir operatsııanyń ortasha mólsheri 83,9 myń teńge bolyp, jyldyq ósim 11% boldy, — delingen habarlamada.

Sarapshylardyń aıtýynsha, qolma-qol aqsha alý operatsııalarynyń sany azaıýda. Sonymen birge, qazaqstandyq kartalar arqyly shetelde jasalatyn qolma-qol emes tólemderdiń onnan jeteýi onlaın túrde júrgiziledi. 

Bir onlaın-tólemniń ortasha somasy teńgemen eseptegende 13,6 myń teńgeni qurap otyr, bul ótken jylǵy 12,3 myń teńgemen salystyrǵanda joǵary kórsetkish. 
Eske sala ketsek, bıyl jazda Ulttyq bank «dropperlerdiń» tólem kartalary arqyly jasalatyn alaıaqtyq shemalar kóbeıgenin eskertken edi.