Qazaqstandyq tennısshilerdiń Ýımbldon týrnırindegi qarsylastary anyqtaldy

ASTANA. KAZINFORM – Ulybrıtanııa astanasy Londonda Ýımbldon týrnıriniń jerebesi tartyldy.

«Úlken dýlyǵa» jarysynda jekeleı synda Qazaqstannan bes tennısshi óner kórsetedi.

Qazaqstannyń áıelder arasynda birinshi, álemniń 11-raketkasy Elena Rybakına alǵashqy aınalymda dúnıejúzilik reıtıngide 48-orynda turǵan armenııalyq Elına Avanesıanmen sheberlik baıqasady.

E.Rybakına 2022 jyly Ýımbldonda jeńimpaz atansa, ótken jyly jartylaı fınalǵa deıin jetti.

Reıtıngide 34-oryndaǵy ıÝlııa Pýtıntseva álemniń 13-raketkasy, amerıkalyq Amanda Anısımovamen synǵa túsedi. 

Qazaqstannyń erler arasynda birinshi, álemniń 30-raketkasy Aleksandr Býblıktiń bastapqy qarsylasy – reıtıngide 54-oryndaǵy ıspanııalyq Haıme Mýnıar.

Álemniń 97-raketkasy Aleksandr Shevchenko reıtıngide 72-oryndaǵy amerıkalyq Reıllı Opelkadan ótýge tyrysyp kóredi.

Ýımbldon dodasyna alǵash ret joldama alǵan reıtıngide 251-satydaǵy Beıbit Juqaevqa azýly qarsylas, álemniń 24-raketkasy, ıtalııalyq Flavıo Kobollı tap boldy.

Atalmysh jarys Londonda 30 maýsym – 13 shilde aralyǵynda ótedi.

Eske sala keteıik, budan buryn Beıbit Juqaevtyń alǵash ret Ýımbldon týrnırine joldama alǵanyn jazǵan edik.