Qazaqstandyq tennısshilerdiń Indıan-Ýells týrnırindegi qarsylastary belgili boldy

ASTANA. KAZINFORM — AQSh-tyń Indıan-Ýells qalasynda 6-17 naýryzda ótetin týrnırdiń jerebesi tartyldy.

Indıan-Ýells WTA 1000 jarysyn Qazaqstannyń birinshi, álemniń 4-raketkasy Elena Rybakına ekinshi aınalymnan bastap, reıtıngide 73-oryndaǵy ıspanııalyq Paýla Badosa nemese amerıkalyq Eshlın Krıýgerdiń (№ 71) qaı jeńgenimen kezdesedi. Bul eki tennısshi de dodaǵa arnaıy shaqyrtý alǵan.

Taǵy bir qazaqstandyq, reıtıngide 79-oryndaǵy ıÝlııa Pýtıntseva alǵashqy aınalymda álemniń 76-raketkasy, germanııalyq Tamara Korpachtan ótýge tyrysady.

Ótken jyly Indıan-Ýellste E.Rybakına úzdik shyqsa, ıÝ.Pýtıntseva birinshi oıynynda súringen edi.

Erler arasynda Indıan-Ýells masters týrnırinde 20-raketka bolyp tirkelgen Aleksandr Býblık te ekinshi aınalymnan bastaıdy. Onyń qarsylasy álemniń 33-raketkasy, aýstralııalyq Djordan Tompson nemese irikteý saıysy jeńimpazdarynyń bireýi bolmaq.

Álemniń 51-raketkasy Aleksandr Shevchenko bastapqy matchyn reıtıngide ózinen eki saty joǵary turǵan germanııalyq Domınık Kepfermen ótkizedi.

Іrikteý saıystaryna qatysqan reıtıngide 191-oryndaǵy Beıbit Juqaev álemniń 142-raketkasy, frantsııalyq Garold Maıoǵa jol berdi – 3:6, 1:6.

Ótken jyly fınalda reseılik Danııl Medvedevti qapy qaldyrǵan ıspanııalyq Karlos Alkaras úzdik atansa, A.Býblık alǵashqy aınalymda-aq jarys jolynan shyǵyp qalǵan edi.

Eske sala keteıik, budan buryn Elena Rybakınanyń AQSh-taǵy jarys qarsańynda alǵashqy jattyǵýyn ótkizgenin jazǵan bolatynbyz.