Qazaqstandyq tennısshiler Túrkııadaǵy týrnırde ekinshi ret qatarynan chempıon atandy
ASTANA. KAZINFORM – Qazaqstandyqtar Asyljan Arystanbekova men Іńkár Dúısebaı juptyq synda Kaıserı (Túrkııa) ITF W15 týrnırinde úzdik shyqty.
Jarystyń 1-raketkalary bolyp tirkelgen Asyljan men Іńkár búgin eki kezdesýin sátti aıaqtaı bildi.
Qazaqstandyq jup jartylaı fınalda dodanyń 4-raketkalary, ýkraınalyqtar Marııa Bergen – Katerına Dıatlovany aıqyn basymdylyqpen jeńdi – 6:0, 6:3.
A.Arystanbekova – І.Dúısebaı fınalda túrkııalyqtar Dýrý Soke – Doga Túrkmenmen chempıondyq ataqty sarapqa saldy.
Birinshi partııada qazaqstandyqtar 6:2 esebimen basym tústi. Ekinshi sette túrkııalyq dýet ese qaıyrdy – 6:2. Sýper taı-breıkte Asyljan men Іńkár jeńisti julyp aldy – 10:5. Osylaısha, Asyljan Arystanbekova men Іńkár Dúısebaı juptyq synda ITF týrnırlerindegi kezekti tıtýlyna qol jetkizdi.
Ótken jyly birneshe dodada jeńimpaz atanǵan qazaqstandyqtar bıyl Ispanııadaǵy jarysta úzdik shyqqan edi. Sonymen qatar bir apta buryn Asyljan men Іńkár Kaıserıdegi osyndaı týrnırde top jarǵan bolatyn.
Eske sala keteıik, budan buryn qazaqstandyq tennısshilerdiń Ispanııadaǵy jarysta úzdik shyqqanyn jazǵan edik.
