Qazaqstandyq tennısshiler Indıan-Ýells týrnırinde tabysty óner kórsete ala ma
ASTANA. KAZINFORM – Qazaqstandyq tennısshiler Indıan-Ýells (AQSh) masters týrnırinde baq synaıdy.
Indıan-Ýells WTA 1000 jarysynyń úshinshi raketkasy bolyp tirkelgen Elena Rybakına dodany ekinshi aınalymnan bastaıdy.
Qazaqstandyq tennısshi ekinshi aınalymda álemniń 43-raketkasy, amerıkalyq Heılı Baptıst nemese reıtıngide 108-oryndaǵy Emılıana Arangonyń qaı jeńgenimen oınaıdy.
Bıyl Aýstralııa ashyq chempıonatynyń jeńimpazy atanǵan E.Rybakınanyń Dýbaıdaǵy týrnırdiń úshinshi aınalymynda densaýlyǵyna baılanysty matchty jalǵastyrýdan bas tartqany belgili. Tennıs mamandary qazaqstandyq tennısshini favorıtterdiń qataryna qosyp otyr. Tek babynda bolsa, bolǵany. Onyń ústine E.Rybakınanyń 2023 jyly Indıan-Ýellste úzdik shyqqany belgili.
Álemniń 76-raketkasy ıÝlııa Pýtıntseva alǵashqy aınalymda reıtıngide 106-oryndaǵy ıspanııalyq Paýla Badosamen kezdesedi. P.Badosa – reıtıngide quldyrap ketkenimen, myqty tennısshilerdiń biri. Sondyqtan bul match ıÝ.Pýtıntsevaǵa ońaıǵa túspeıdi.
Erler arasynda Indıan-Ýells masters týrnırinde Aleksandr Býblık 10-raketka retinde tirkelgen. Ol ekinshi aınalymda álemniń 76-raketkasy, frantsııalyq Artýr Kazo nemese reıtıngide 145-satydaǵy amerıkalyq Maıkl Chjenniń bireýimen sheberlik baıqasady. A.Býblık óz deńgeıinde oınasa, birazǵa deıin barýy yqtımal.
Taǵy bir qazaqstandyq, álemniń 88-raketkasy Aleksandr Shevchenko bastapqy kezdesýin irikteý saıysy jeńimpazdarynyń birimen ótkizedi. A.Shevchenko ekinshi aınalymǵa ótse, álemniń 13-raketkasy, norvegııalyq Kasper Rýýdqa tap bolady.
Indıan-Ýells jarysy 4-15 naýryz aralyǵynda ótedi.
Eske sala keteıik, budan buryn Elena Rybakınanyń WTA chempıondyq kestesinde kósh bastap kele jatqanyn jazǵan bolatynbyz.
