Qazaqstandyq tennısshiler halyqaralyq týrnırlerdiń fınalynan tys qaldy

ASTANA. KAZINFORM – Qazaqstandyq tennısshiler Dmıtrıı Popko men Denıs Evseev halyqaralyq týrnırlerdiń fınalyna shyǵa almady.

Dúnıejúzilik reıtıngide 358-orynda turǵan D.Popko Býenos-Aıres 2 (Argentına) chellendjer jarysynyń jartylaı fınalynda álemniń 241-raketkasy, argentınalyq Fakýndo Banıspen betpe-bet keldi.

Saǵat jarymnan astam ýaqytqa sozylǵan kezdesýde kort ıesi 6:4, 7:5 esebimen jeńiske jetti.
Taǵy bir qazaqstandyq, reıtıngide 184-satydaǵy Denıs Evseev Tenerıfe (Ispanııa) chellendjer dodasynyń jartylaı fınalynda álemniń 127-raketkasy, amerıkalyq Brendon Nakasımadan aılasyn asyra almady. Bir saǵat 25 mınýtqa sozylǵan básekede amerıkalyq sportshy 7:6 (8:6), 6:2 esebimen basym tústi.

Osylaısha, eki qazaqstandyq tennısshi de chellendjer týrnıriniń fınalynan tys qaldy.

Eske sala keteıik, budan buryn Aýstralııa ashyq chempıonatynda jasóspirimder arasynda Ámir Omarhanovtyń jarystyń 1-raketkasyn utqanyn jazǵan bolatynbyz.