Qazaqstandyq tennısshi Túrkııadaǵy týrnırdiń fınalyna shyqty

Qazaqstandyq, álemniń 458-raketkasy Dmıtrıı Popko Antalııa (Túrkııa) ITF týrnıriniń fınalyna ótti, dep habarlaıdy Kazinform.

Jarystyń 1-raketkasy bolyp tirkelgen qazaqstandyq tennısshi jartylaı fınalda dúnıejúzilik reıtıngide 783-orynda turǵan reseılik Evgenıı Tıýrnevpen betpe-bet keldi.

Báseke óte tartysty ótip, birinshi partııada taı-breıkte D.Popko ústemdik tanytty – 7:6 (7:2).

Esesine ekinshi sette reseılik sportshy qarymta qaıyrdy – 6:3.

Degenmen, sheshýshi – úshinshi partııada D.Popko tarazy basyn ózine aýdara aldy – 6:4.

Dmıtrıı Popko fınalda reıtıngide 743-satydaǵy ıspanııalyq Maks Alkala Gýrrımen bas júldeni sarapqa salady. Ol jartylaı fınalda ıtalııalyq Samýele Perıdi tize búktirdi – 6:7 (4:7), 6:4, 6:3.

Eske sala keteıik, budan buryn Dmıtrıı Popkonyń Túrkııadaǵy týrnırdiń jartylaı fınalyna ótkenin jazǵan bolatynbyz.

Sondaı-aq qazaqstandyq jas tennısshi Týnıstegi týrnırdiń jartylaı fınalyna deıin jetti.