Qazaqstandyq tennısshi Marsel týrnıriniń 1-raketkasyna jol berdi

MARSELЬ. KAZINFORM – Qazaqstannyń ekinshi, álemniń 56-raketkasy Aleksandr Shevchenko Marsel (Frantsııa) ATP 250 týrnıriniń shırek fınalynan tys qaldy.

Qazaqstandyq tennısshi ekinshi aınalymda álemniń 8, osy jarystyń ótken jylǵy chempıony ári bıylǵy 1-raketkasy, Polsha ókili Hýbert Gýrkachqa tap boldy.

Birinshi partııada Gýrkachtyń basymdylyǵy aıqyn baıqaldy – 6:1. Ol ekinshi setti de óz esebine jazdy – 6:4. 

Bir saǵattan astam ýaqytqa sozylǵan báseke barysynda polıak tennısshisi 13 eıs jasap, 8 breık-poınttyń beseýin paıdalanyp úlgerdi. A.Shevchenko 3 eıs, 2 breıkti (5 breık-poınt) qanaǵat tutty.

Osylaısha, Aleksandr Shevchenko jarys jolynan shyǵyp qaldy.

H.Gýrkach jartylaı fınalǵa shyǵý úshin álemniń 66-raketkasy, chehııalyq Tomash Mahachpen talasady.

Eske sala keteıik, budan buryn Devıs kýboginde Qazaqstan quramasynyń qarsylasy anyqtalǵanyn jazǵan bolatynbyz.

Sondaı-aq Elena Rybakına Ábý-Dabı týrnıriniń shırek fınalyna shyqty.