Qazaqstandyq tennısshi Dmıtrıı Popko Býenos-Aıreste negizgi týrnırge ótti

Qazaqstandyq, álemniń 417-raketkasy Dmıtrıı Popko Býenos-Aıres (Argentına) chellendjer týrnıriniń irikteý saıystaryn sátti ótkizdi, dep habarlaıdy Kazinform.

Qazaqstandyq tennısshi aldymen argentınalyq Aleksıs Gýrmendıdi 2 saǵat 18 mınýtqa sozylǵan tartysty matchta 6:4, 6:7 (1:7), 6:3 esebimen joldan taıdyrdy.

Sodan keıin irikteý saıystarynyń fınalynda dúnıejúzilik reıtıngte 688-orynda turǵan taǵy bir kort ıesi Leonardo Aboıanmen sheberlik baıqasty. Bul joly 1 saǵat 12 mınýtqa sozylǵan básekede L.Aboıandy 6:3, 6:3 esebimen utty.

Osylaısha, Dmıtrıı Popko 9-14 qańtar aralyǵynda ótetin negizgi jarysqa joldama aldy. Onyń kelesi qarsylasy keıin anyqtalady.

Eske sala keteıik, budan buryn Elena Rybakınanyń qazaqstandyq jankúıerlerge alǵys aıtqanyn jazǵan bolatynbyz.