Qazaqstandyq teleskop Ispanııa men Ózbekstan observatorııalarynda ornatylady
ALMATY. KAZINFORM – Qazaqstandyq teleskoptar sheteldik observatorııalarda ornatylady.
Bul týraly Kazinform agenttiginiń tilshisine Almatydaǵy Fesenkov atyndaǵy astrofızıka ınstıtýtynyń ınjener-zertteýshisi Maksım Krýgov suhbat barysynda aıtty.
Onyń sózinshe, qazirgi ýaqytta «Astrotehprıbor» kompanııasymen birlesip, Ispanııanyń Teıde observatorııasynda dıametri 115 santımetr bolatyn teleskop, sondaı-aq Ózbekstannyń Maıdanaq observatorııasynda 80 santımetrlik teleskop ornatylyp jatyr.
— Bul — qazaqstandyq teleskoptar jelisin damytýǵa baǵyttalǵan bir tizbektiń bóligi. Mekenjaılar Jerdiń aınalýyn eskere otyryp tańdaldy, bul baqylaýdyń úzdiksiz bolýyn qamtamasyz etýge jáne astronomııalyq nysandarǵa monıtorıng jasaý barysynda olqylyqtardyń bolmaýyna múmkindik beredi, — dedi ol.
Odan bólek maman Almaty mańynda ornalasqan Assy observatorııasy da qarqyndy túrde damyp kele jatqanyn atap ótti.
— 2030 jylǵa qaraı «Astrohab» jobasy aıasynda ártúrli ǵylymı toptarǵa arnalǵan júzden astam teleskop ornatýdy josparlap otyrmyz. Jumysqa qazaqstandyq stýdentter men ınstıtýt qyzmetkerlerin belsendi túrde tartý kózdelip otyr, — dedi Maksım Krýgov.
Aıta ketken jón, Teıde observatorııasy 1964 jyly Tenerıfe aralynda, teńiz deńgeıinen 2400 metr bıiktikte qurylǵan. Ol óńirdiń biregeı astroklımattyq jaǵdaılarynyń arqasynda ártúrli memleketter óz teleskoptaryn ornatqan alǵashqy halyqaralyq observatorııalardyń biri boldy.
Al Maıdanaq observatorııasy 1970 jyly Maıdanaqtyń batys bóliginde, Shahrısabzadan ońtústikke qaraı 45 shaqyrym jerde, teńiz deńgeıinen 2650 metr bıiktikte negizi qalanǵan. Ol atmosferalyq jaǵdaılarynyń joǵary sapasymen jáne geografııalyq ornalasýymen tanymal.
Eske salaıyq, buǵan deıin Assy-Túrgen observatorııasy Starlink-ke qosylatynyn jazǵanbyz.