Qazaqstandyq taýar óndirýshilermen 1,4 trln teńgege kelisimshart jasalady
ASTANA. KAZINFORM – Premer-mınıstr Oljas Bektenov «Samuryq-Qazyna» ulttyq ál-aýqat qory» AQ dırektorlar keńesiniń otyrysyn ótkizdi. Qordyń basqarma tóraǵasy Nurlan Jaqypovtyń óndiristik jáne qarjylyq kórsetkishter týraly esebi tyńdaldy.
Memleket basshysynyń basym ınfraqurylymdyq jobalardy júzege asyrý jónindegi tapsyrmalarynyń oryndalý barysy qaraldy. Qor basshylyǵy ekonomıkanyń basym salalaryndaǵy jalpy somasy shamamen 36,4 trln teńgeni quraıtyn ınvestıtsııalyq 46 iri joba týraly baıandady.
Búgingi tańda «Polıetılen óndirisi», kúkirt qyshqyly zaýyty jáne «Moıynty – Qyzyljar» temirjol jelisi, Jańaózen qalasyndaǵy gaz óńdeý zaýyty, sondaı-aq «Shý», «Jambyl», «Shymkent» qosalqy stansalarynda Qazaqstan BEJ ońtústik aımaǵynyń elektr jelisin nyǵaıtý sheńberinde qurylys-montajdaý jumystary bastaldy.
Nurlan Jaqypovtyń aıtýynsha, 2025 jyldyń sońyna deıin «Dostyq – Moıynty» temirjol jelisi, Almaty qalasyn aınalyp ótetin aınalma temirjol jelisi, Aqtaý porty bazasyndaǵy konteınerlik hab, «Taldyqorǵan – Úsharal» magıstraldy gaz qubyry, Kendirlidegi sý tuşytý zaýyty sııaqty ınfraqurylymdyq nysandardy, sondaı-aq Caspi Bitum zaýytyn keńeıtý jáne Pavlodar munaı-hımııa zaýytynda dızel otynyn gıdrotazartý qondyrǵysyn rekonstrýktsııalaý jobalaryn aıaqtaý josparlanyp otyr.
Otandyq taýar óndirýshilerdi qoldaý baǵytynda atqarylyp jatqan jumystarǵa nazar aýdarylýda. Qordyń satyp alý tártibinde: taýarlardy OTÓ-den satyp alý basymdyǵy, jumystar men qyzmetterdi oryndaý kezinde OTÓ-den taýarlardy satyp alý boıynsha merdigerler men qosalqy merdigerlik uıymdardyń mindettemeleri, sondaı-aq 16-dan astam qosymsha qoldaý sharalary kózdelgen. Atalǵan qoldaý sharalary sheńberinde qazaqstandyq taýar óndirýshilermen jasalǵan kelisimsharttar sanyn 2024 jylǵy 1,1 trln teńgeden 2025 jyly 1,4 trln teńgege deıin arttyrý josparǵa engizilgen.
Sonymen qatar «Importty almastyrý» baǵdarlamasy boıynsha «Samuryq-Qazyna» qory ótken jyly qazaqstandyq kásipkerlermen 191 mlrd teńgege ofteık-kelisimsharttar jasady – bul 10 ese ósim. Kásipkerlikti qoldaý sharalarynyń biri – skstore.kz elektrondyq dúkeni. Platformada 13 myńnan astam ShOB ókili jáne 500 otandyq taýar óndirýshi tirkelgen. 2024 jyldyń qorytyndysy boıynsha 14,6 mlrd teńgege 25 myń tapsyrysty quraǵan, bul ótken jylmen salystyrǵanda 7 esege kóp.
Premer-mınıstr «Samuryq-Qazyna» qory basshylyǵyna jáne jaýapty mınıstrlikterge jobalardyń Qazaqstan ınfraqurylymyna, energetıkasyna, kólik logıstıkasyna, ónerkásiptik jáne ekonomıkalyq damýyna mýltıplıkatıvti áserin eskere otyryp, olardyń ýaqtyly júzege asyrylýyn qamtamasyz etýdi tapsyrdy.