Qazaqstandyq taýar óndirýshilerdiń tizimi qaıta jasalady

ASTANA. KAZINFORM — Ónerkásip jáne qurylys mınıstri Ersaıyn Naǵaspaev qazaqstandyq taýar óndirýshilerdiń tizimi qaıta jasalatynyn málim etti.

— Bıylǵy zańnamadaǵy jańalyqtardyń biri — qazaqstandyq taýar óndirýshilerdiń biryńǵaı tizilimin qurý. Bul — óndirýshiler men olardyń ónimderi týraly málimetterdi qamtıtyn memlekettik tsıfrlyq júıe. Tizilimdi engizý jınaqtalǵan málimetter negizinde «jalǵan óndirýshilerdi» anyqtaýǵa, ashyqtyqty arttyrýǵa, jemqorlyqty azaıtýǵa múmkindik beredi, — dedi ol.

Aıtýynsha, bul tizilimge óndirýshilerdi engizý mehanızmi tórt kezeńde júrgiziledi.

— Birinshiden, aqparattyq júıe arqyly ótinim berilip, derekterdi óńdeýge ruqsat berý elektrondyq tsıfrlyq qoltańba arqyly rastalady. Ekinshiden, memlekettik derekter bazasymen tsıfrlyq tekserý arqyly usynylǵan málimetterdiń durystyǵy tekseriledi. Úshinshiden, tehnologııalyq operatsııalardyń oryndalýy baǵalanady, qajet bolǵan jaǵdaıda óndiristik alańǵa baryp baǵalaý júrgiziledi. Tórtinshiden, tizilimdegi otandyq taýar óndirýshilerge toqsan saıyn monıtorıng júrgiziledi, — dedi mınıstr.

Aıta ketý kerek, satyp alý konkýrstaryna, memlekettik qoldaý sharalaryna qatysqysy keletin kásiporyndar atalmysh tizilimde mindetti shart bolyp bekitilmek.