Qazaqstandyq taýar óndirýshiler tiziliminde myńnan astam kompanııa talapqa saı bolmaı shyqty
ASTANA. KAZINFORM — Qazaqstandyq óndirýshiler bazasy keńeıip, ónimder resmı mártebe aldy. Ónerkásip jáne qurylys mınıstrligi salalyq memlekettik organdarmen birlesip, Qazaqstandyq taýar óndirýshiler tizilimin qalyptastyrý jumystaryn júıeli túrde jalǵastyryp keledi. Bul týraly vedomstvonyń baspasóz qyzmeti málim etti.
Búginde tizilimniń aqparattyq júıesine (e-ondiris.gov.kz) 26 257 ótinim joldanyp, onyń 22 myńnan astamy qaraldy. Bul jalpy ótinimderdiń 80%-dan astamyn quraıdy.
Sonyń nátıjesinde óndiristik qyzmeti saraptamadan ótken otandyq óndirýshilerdiń aýqymdy bazasy qalyptasty. Qazirgi tańda atalǵan bazaǵa 5 834 óndirýshi engizildi. Onyń ishinde:
- 4321-i – tolyqqandy Qazaqstan Respýblıkasynyń aýmaǵynda óndirilgen taýarlardyń óndirýshileri;
- 1 513-i – qaıta óńdelgen ónim shyǵaratyn kásiporyndar.
Jalpy aıtqanda, 40 myńnan astam taýar qazaqstandyq ónim retinde tanyldy.
Otandyq ónimdi satyp alýǵa basymdyq berý úshin tizilim negizgi satyp alý platformalarymen (EGZ, Samruk Store, Omarket, Mitwork) ózara úılestirildi. Máselen, jyl basynan beri «Elektrondyq memlekettik satyp alý» portalynda shamamen 24 762 satyp alý, «Samuryq-Qazyna» portalynda 2 646 satyp alý ótkizildi.
Sondaı-aq óndiristik qyzmetti baǵalaý nátıjesinde 1 053 kompanııanyń ótinimi keri qaıtaryldy.
Bas tartýdyń negizgi sebepteri tómendegideı:
- tsıfrlyq tekserý nátıjeleriniń teris bolýy;
- óndiristik talaptar men tehnologııalyq úderisterdiń (2025 jylǵy 25 qyrkúıektegi №392 buıryqqa sáıkes) rastalmaýy, onyń ishinde eń tómengi shekke, málimetter men usynylǵan beınematerıaldarǵa sáıkes kelmeýi;
- usynylǵan beınematerıaldardyń óndiristi naqty aıqyndaýǵa múmkindik bermeýi nemese birdeı materıaldardyń birneshe ótinimde qoldanylýy;
- ónim týraly málimetterdiń, elishilik qundylyq deńgeıiniń jáne óndiristik qýattyń sáıkessizdigi;
- tolyq emes nemese shyndyqqa sáıkes kelmeıtin qujattar men aqparattyń usynylýy;
- kóshpeli tekserýler barysynda anyqtalǵan buzýshylyqtar, sonyń ishinde birdeı qujattardyń túrli ótinimderde paıdalanylýy.
Tizilimdi odan ári jetildirý jáne usynylatyn málimetterdiń shynaıylyǵyn arttyrý jumystary jalǵasady.
Buǵan deıin de Ónerkásip jáne qurylys mınıstrligi tiziliminde zań buzýshylyqtar bolǵany aıtylǵan. Sol sebepti tizilimge ený úshin ótinim beretin kompanııalardy qujattardy daıyndaýǵa barynsha jaýapkershilikpen qarap, tek shynaıy ári dál aqparat usynýǵa shaqyrǵan edi.
Qazaqstandyq taýar óndirýshiler tizilimine engizý tek usynylǵan málimetterdiń durystyǵy men tolyqtyǵy qamtamasyz etilgen, sondaı-aq belgilengen talaptarǵa sáıkes naqty óndiris bolǵan jaǵdaıda ǵana múmkin bolatynyn atap ótken jón.
