Qazaqstandyq taýar óndirýshiler tizilimi: qandaı ótinimder keri qaıtarylady
ASTANA. KAZINFORM - Ónerkásip jáne qurylys mınıstrligine kásipkerlerden qazaqstandyq taýar óndirýshiler reestrine engizý úshin ótinimder túsip jatyr. Olardy qaraý barysynda usynylǵan málimetterdiń belgilengen talaptarǵa sáıkes kelmeıtin birqatar jaǵdaı anyqtaldy, dep habarlaıdy QR Ónerkásip jáne qurylys mınıstrliginiń baspasóz qyzmeti.
Tekserý nátıjesinde mynadaı sáıkessizdikter anyqtaldy:
- málimdelgen ónim kodtary arasyndaǵy aıyrmashylyqtar;
- jeke menshiktegi jabdyqtyń nemese óndiristik qýattardyń bar ekenin rastaıtyn qujaty joq sharttar;
- shynaıy emes foto jáne beınematerıaldardy paıdalaný;
- qyzmetkerler sany men materıaldyq-tehnıkalyq bazanyń málimdelgen óndiris kólemderine sáıkes kelmeýi belgili boldy.
Mysaly, bir keıste kompanııa 50-den astam qyzmeti baryn málimdegen, alaıda derekterde tek bir ǵana tigin jabdyǵy kórsetilgen. Sonymen qatar, kásiporyn usynǵan dıstrıbıýtorlyq shartta óndiristik jabdyqqa menshik quqyǵynyń nemese ony paıdalaný faktisiniń rastamasy bolmaǵan.
Sondaı-aq «Servıs-Fo» JShS ózge jıhaz óndirýshisi retinde ótinim bergen, alaıda tsıfrlyq verıfıkatsııa barysynda Qazaqstandyq taýar óndirýshiler tizilimin júrgizý qaǵıdalarymen bekitilgen ólshemsharttar boıynsha óndiristik qyzmettiń tómen kórsetkishin alyp, tizilimge engizýden bas tartý týraly sheshim shyǵaryldy.
-Osy oraıda, bas tartý jónindegi sheshimde kórsetilgen eskertýlerdi joıyp, derekterin belgilengen talaptarǵa sáıkestendirgen kompanııalar ótinimdi qaıta tapsyryp, sodan keıin tizilimge engizilýge múmkindigi bar ekenin aıta ketý kerek. Bastysy – talapqa sáıkestendirip, ótinimdi qaıta jiberý qajet, - delingen habarlamada.
Osyǵan baılanysty Ónerkásip jáne qurylys mınıstrligi tizilimge engizý úshin ótinim beretin kompanııalardy qujattardy daıyndaýǵa barynsha jaýapkershilikpen qarap, tek shynaıy ári dál aqparat usynýǵa shaqyrady.
Qazaqstandyq taýar óndirýshiler tizilimine engizý tek usynylǵan málimetterdiń durystyǵy men tolyqtyǵy qamtamasyz etilgen, sondaı-aq belgilengen talaptarǵa sáıkes naqty óndiris bolǵan jaǵdaıda ǵana múmkin bolatynyn atap ótken jón.
Zańbuzýshylyqtar anyqtalǵan jaǵdaıda mınıstrlik tizilimge engizýden bas tartý nemese qoldanystaǵy zańnama aıasynda óndiris oryndaryna qosymsha kóshpeli tekserýler júrgizý quqyǵyn ózine qaldyrady.
Sonymen qatar, adal taýar óndirýshilerdi tizilimge engizý jónindegi jumys jalǵasatyn bolady.
Búgingi statıstıkaǵa toqtalsaq, ındýstrııalyq sertıfıkattar tetigi arqyly Tizilimge 1 924 kásiporyn engizilgen. Júıede 5 435 kompanııa avtorızatsııadan ótken, barlyǵy 12 938 ótinim tapsyrylǵan. Qaraý nátıjesinde 739 sýbektiden túsken 3 210 ótinim tirkeldi, olardyń 447-eýi – ındýstrııalyq sertıfıkat ıeleri. Sonymen birge, 497 kásiporynnan túsken 3 176 ótinim keri qaıtaryldy.
Osyǵan deıin óndirýshilerdiń qazaqstandyq taýar óndirýshiler reestrinde tirkelýi tıis ekeni týraly jazdyq.