Qazaqstandyq tasymaldaýshylar úshin ózbek shekarasynda ruqsat qaǵazyn alý jeńildeıdi
ASTANA. KAZINFORM – Ózbekstandyq ruqsat blankilerin berýdi odan ári ońaılatý maqsatynda QR Kólik mınıstriniń, Qarjy mınıstriniń Tsıfrlyq damý, ınnovatsııalar jáne aeroǵarysh ónerkásibi mınıstriniń ózbekstandyq ruqsat blankilerin berý jónindegi pılottyq jobany iske asyrý týraly birlesken buıryǵynyń jobasy ázirlendi.
Pılottyq jobaǵa sáıkes, bıyl sáýir aıynan bastap Atameken, B.Qonysbaev, Qazyǵurt, Qaplanbek jáne Tájen ótkizý pýnktterinde keden organdary ózbekstandyq ruqsat blankilerin elektrondyq túrde bere bastaıdy.
Tasymaldaýshylar «úshinshi elderge/elderden» túrindegi ruqsatty alý úshin Qarjy mınıstrligine qarasty Memlekettik kirister komıtetiniń aýmaqtyq organdary arqyly CarGoRuqsat elektrondyq kezektiń avtomattandyrylǵan júıesin paıdalana alady. Ol úshin kelesi qujattardyń bolýy mindetti:
1) elektrondyq kezek júıesinde tirkeý;
2) kólik quraldaryna arnalǵan qujattar;
3) sheteldik ruqsatty qoldaný arqyly/qoldanýsyz ruqsat kýáligi;
4) sheteldik ruqsatty qoldaný arqyly/qoldanýsyz avtokólik quraldaryna ruqsat kartochkalary;
5) QR aýmaǵynan ketkeni úshin alym somasynyń bıýdjetke tólenýi.
«Atalǵan mehanızm tasymaldaýshylarǵa Ózbekstan Respýblıkasymen júk tasymaldaýdy jeńildetýge jáne kezektegi oryndarmen ári ruqsat blankilerimen alypsatarlyqtyń aldyn alýǵa múmkindik beredi dep kútilýde», - delingen Kólik mınıstrligi baspasóz qyzmetiniń habarlamasynda.
Ózbekstan Respýblıkasyna Qazaqstan aýmaǵy arqyly keletin otandyq tasymaldaýshylar atalǵan ótkizý pýnktterinde ózbekstandyq ruqsat qaǵazyn elektrondyq túrde alatyn bolady.
