Qazaqstandyq tanymal ánshi kimge Silk Way Star baıqaýynda qalýǵa múmkindik berdi
ASTANA. KAZINFORM — Astanada Silk Way Star halyqaralyq án baıqaýynyń besinshi epızody aıaqtaldy.
Osy aptada qatysýshylar kórermenderdi óz elderiniń mádenıetimen jáne halyq ónerimen tanystyrdy. Árqaısysy óz ana tilinde etnıkalyq áýenderdi shyrqady. Kóbisi sahnaǵa ulttyq naqyshta tigilgen kıimmen shyǵyp, óz qoıylymdaryn dýmandy mını-spektaklge aınaldyrdy.
Besinshi epızodta Armenııa ókili - ánshi Saro Gevorgıan kósh bastady.
Ońtústik Koreıanyń Kandis toby eń tómen upaı jınady jáne olardyń jobaǵa qatysýy aıaqtalatyny málim boldy. Alaıda, Qazaqstannan qazylar alqasynyń quramyndaǵy belgili ánshi Janar Duǵalova eshkim kútpegen málimdeme jasady.
- Osy joly Kandis toby óz múmkindikterin tolyq kórsete almaǵan sııaqty. Biraq olar bizdiń ótinishimiz boıynsha akapellany oryndaǵanda, osy toptyń qabiletine kóz jetkizdik. Olar qatysýshalar arasyndaǵy jalǵyz top jáne bul jaǵdaı men úshin shynymen de qıyn. Olar ár efır saıyn naǵyz shoýdy kórsetip keledi. Olar Qazaqstanda jankúıerlerin de jınap úlgerdi. Silk Way Star – bul jaı vokaldyq baıqaý emes, ony erekshe joba dep sanaımyn. Onyń arqasynda ánshilerdiń jan-jaqtylyǵy men barsha áleýeti ashylady. Sondyqtan qabyldaýshy ári uıymdastyrýshy eldiń quqyǵyn paıdalana otyryp, men Kandis tobyn jobada qaldyrǵym keledi, - dedi Janar Duǵalova.
Endi, barlyq qatysýshy jarysty jalǵastyryp, kelesi aptada sahnaǵa qaıta oralady. Shoý Qazaqstan astanasynda ótse de, ony búkil álemde — Uly Jibek joly elderiniń telearnalarynda mıllıondaǵan kórermen tamashalaýda.
Bes kezeńniń qorytyndysy boıynsha baıqaý kestesi osylaı qalyptasty:
- Mońǵolııa — 572 ball
- Qazaqstan — 572 ball
- Armenııa — 570 ball
- Malaızııa — 570 ball
- Ózbekstan — 562 ball
- Grýzııa — 560 ball
- Qytaı — 558 ball
- Tájikstan — 552 ball
- Qyrǵyzstan — 538 ball
- Ońtústik Koreıa — 508 ball.
Bes kezeńniń jalpy qorytyndysynda Mıshel Djozef (Mońǵolııa) jáne ALEM (Qazaqstan) eń kóp upaı jınap úlgerdi.
Qazaqstanda joba ár senbi kúni saǵat 20:00–de Jibek Joly telearnasynda jáne saǵat 22:30–da Silk Way telearnasynda shyǵady, bul halyqaralyq aýdıtorııaǵa jol ashady.
Buǵan deıin habarlanǵandaı, baıqaýǵa 12 el, atap aıtqanda Armenııa, Ázerbaıjan, Grýzııa, Qazaqstan, Qyrǵyzstan, Qytaı, Malaızııa, Mońǵolııa, Ońtústik Koreıa, Ózbekstan, Tájikstan jáne Túrikmenstan ókilderi qatysýǵa keldi.
Jeńimpazǵa SILK WAY STAR erekshe ataǵy berilip, ónerin jahandyq sahnada tanytý múmkindigi usynylady.