Qazaqstandyq tanymal akter Shárip Serik túsirý alańynan qýyldy
ALMATY. KAZINFORM – Tanymal qazaqstandyq akter Shárip Serik jelidegi vıdeodan keıin kıno alańynan shettetildi. Polıtsııa tergeý júrgizip jatyr.

Almaty turǵyny Álııa Bóteeva áleýmettik jelide akter Shárip Seriktiń qol kótergenin aıtyp, dálel retinde vıdeo men sýretter jarııalady.
Almaty qalalyq Polıtsııa departamenti atalǵan derek boıynsha tergeý bastalǵanyn málimdedi.
– Tergeý amaldary júrgizilip jatyr. Oqıǵanyń bolǵan orny men ýaqytyn qosa alǵanda, obektıvti mán-jaılar anyqtalyp, Qazaqstan Respýblıkasynyń zańnamasyna sáıkes sharalar qabyldanatyn bolady, – dep habarlady vedomstvodan.
Sálem Entertainment kompanııasy akter Shárip Serikpen áriptestik qarym-qatynasyn toqtatý týraly sheshim qabyldaǵandaryn málimdedi.
– Sońǵy oqıǵalarǵa baılanysty Sálem Entertainment ujymy Shárip Serikti «qara tizimge» engizip, onymen kez kelgen yntymaqtastyqty tolyǵymen toqtatty. Buǵan deıin jarııalanǵan «Shakal» serıaly men «Qarga» serıalynyń úshinshi maýsymy resmı túrde jabyldy. Sonymen qatar, akter «Meow» serıalynyń ekinshi maýsymynda basty rólderdiń birin somdaýy tıis bolǵan, alaıda ol jobadan tolyqtaı alynyp tastaldy. Sondaı-aq «Patrýl: poslednıı prıkaz» fılminiń shyǵarmashylyq ujymy akterdiń qatysýymen túsirilgen kórinisterdi kınonusqadan alyp tastaý jumystaryn qolǵa aldy. Aktermen barlyq kelisim-shart toqtatyldy, – delingen habarlamada.
Aıta ketsek, byltyr kóliktegi polıtsııa departamenti Qaırat Nurtastyń ústinen «Almaty-Astana» áýe reısinde usaq buzaqylyq jáne densaýlyqqa qasaqana jeńil zııan keltirý faktisi boıynsha ákimshilik is qozǵalǵanyn habarlaǵan edik.
Keıin sottyń qaýlysymen Qaırat Nurtas 15 táýlikke qamaýǵa alyndy.