Qazaqstandyq talapkerlerge jańa múmkindik: Alem AI Talent Lab úsh jyldyq oqýdy qarjylandyrady
ASTANA. KAZINFORM – Astana Hub Alem AI Talent Lab baǵdarlamasyna ótinimder qabyldaýdy bastady. Baǵdarlama bakalavrıat talapkerlerin qoldaıdy, dep habarlaıdy QR Jasandy ıntellekt jáne tsıfrlyq damý mınıstrliginiń baspasóz qyzmeti.
Mınıstrliktiń baspasóz qyzmetiniń habarlaýynsha, baǵdarlama jasandy ıntellekt, ǵylym jáne tehnologııalyq kásipkerlik salasynda damyǵysy keletinderge arnalǵan. Ótinimder 23 tamyzdy qosa alǵanda qabyldanady.
Ótinim berýge matematıka, ınformatıka jáne fızıka baǵyttary boıynsha talapkerler qatysa alady. Іrikteý kezinde motıvatsııa, úlgerim jáne olımpıadalarǵa qatysý eskeriledi. Baǵdarlamanyń alǵashqy legin Astana Hub Qazaq AI Research University-men birlesip ótkizedi.
Baǵdarlama oqýdy úsh jyl boıy qarjylandyrady. Birinshi kýrstan bastap qatysýshylar zertteýler júrgizilip, tehnologııalar jasalatyn kásibı ortaǵa kiredi.
Stýdentterge GPU-qýattar men zertteý ınfraqurylymy ashylady. Qatysýshylarǵa halyqaralyq tájirıbesi bar mentorlar qoldaý kórsetedi. Stýdentter ǵalymdarmen jáne tehnologııalyq kompanııalardyń negizin qalaýshylarmen jumys isteıdi. Tálimgerler qatarynda patent avtorlary, sheteldik ýnıversıtetterdiń zertteýshileri men basshylary bar.
Alem AI jáne Astana Hub ekojúıesi halyqaralyq tájirıbege jol ashady. Úzdik stýdentter AQSh, Eýropa, Qytaı jáne Japonııa ýnıversıtetterimen jáne zertteý ortalyqtarymen jumys isteı alady. Olarǵa sheteldik taǵylymdamalar men akademııalyq utqyrlyq ashylady. Halyqaralyq konferentsııalarǵa qatysý múmkindigi de qarastyrylǵan.
-Búginde jasandy ıntellekt salasyndaǵy báseke - eń aldymen talanttar úshin báseke. Sondyqtan jastardy kásibı joly qalyptasyp jatqan sátte qoldaý mańyzdy. Alem AI Talent Lab zertteýlerge, halyqaralyq saraptamaǵa jáne zamanaýı ınfraqurylymǵa jol ashady. Munyń maqsaty - stýdentterge oqý kezinde-aq álemdik deńgeıdegi tehnologııalardy jasaýdy úıretý - dedi Astana Hub bas dırektory Maǵjan Madıev.
Baǵdarlamanyń negizinde qarapaıym qaǵıda jatyr. Búgin stýdent bastapqy qoldaý alady. Kásibı jetistikke jetken soń onyń qarjylyq áleýetiniń bir bóligi baǵdarlamaǵa qaıta oralady. Bul qarajat kelesi legti qoldaýǵa jumsalady.
Osyǵan deıin bıyl jasandy ıntellekt ýnıversıteti stýdentterdi oqytýdy bastaıtyny týraly jazdyq.
