Qazaqstandyq talapkerler Ázerbaıjan grantyn ıelendi
ASTANA. KAZINFORM - Ál-Farabı atyndaǵy Qazaq ulttyq ýnıversıtetiniń Farabi Hub ınnovatsııalyq ortalyǵynda «Study in Azerbaijan» atty halyqaralyq bilim kórmesi ótip jatyr, dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Sharaǵa Ázerbaıjannyń 25-ke jýyq jetekshi ýnıversıteti qatysyp, ózderiniń bilim berý baǵdarlamalary men ǵylymı jetistikterin tanystyryp jatyr.
Aıtýly sharany Ázerbaıjan Respýblıkasynyń Ǵylym jáne bilim mınıstri Emın Amrýllaev pen QR Ǵylym jáne joǵary bilim vıtse-mınıstri Talǵat Eshenqulov arnaıy aralap kórdi. Kórme jumysymen tanysqan resmı ókilder qatysýshy joǵary oqý oryndarynyń áleýetine joǵary baǵa berdi. Kezdesý aıasynda eki el arasyndaǵy akademııalyq utqyrlyqty keńeıtý, qosdıplomdy bilim berý baǵdarlamalaryn damytý jáne ǵylymı áriptestikti nyǵaıtý máseleleri keńinen talqylandy.
Kórme barysynda talapkerler men stýdentterge Ázerbaıjan ýnıversıtetterinde bilim alý múmkindikteri, granttyq baǵdarlamalar men qabyldaý talaptary týraly jan-jaqty aqparat beriledi. Sharaǵa Almaty mektepteriniń oqýshylary belsendi qatysyp, sheteldik JOO ókilderimen tikeleı tildesýge múmkindik aldy.
Shara aıasyndaǵy eń tartysty kezeń qatysýshylar arasynda uıymdastyrylǵan arnaıy utys oıyny boldy. Utys qorytyndysy boıynsha eki qazaqstandyq talapker Sýmgaıt memlekettik ýnıversıteti usynǵan bilim grantyn ıelendi. Sonymen qatar birqatar qatysýshyǵa baǵaly syılyqtar tabystalyp, Ázerbaıjannyń joǵary oqý oryndarynda alty aılyq tegin taǵylymdamadan ótýge joldamalar berildi.
- Aıta ketý kerek, halyqaralyq kórme 8 sáýir de óz jumysyn jalǵastyrady. Kelýshiler sheteldik joǵary oqý oryndarynyń bilim berý múmkindikterimen tanysyp, bolashaq mamandyǵyn tańdaýǵa múmkindik alady, - delingen habarlamada.
Osyǵan deıin qazaqstandyq oqýshynyń TabAI startap jobasy Google grantyn ıelengeni týraly jazdyq.