Qazaqstandyq «Talaq» fılmi Shanhaı halyqaralyq kınofestıvalinde bas júldege ıe boldy

BEIJІŃ. KAZINFORM — 22 maýsymda Shanhaıda 26-shy halyqaralyq Shanhaı kınofestıvaliniń (SIFF) «Altyn kýbogymen» marapattaý rásimi ótti.

Nátıjesinde «Úzdik fılm» nomınatsııasyn qazaqstandyq «Talaq» fılmi jeńip alsa, osy kınoda basty róldi somdaǵan Amıra Omarova úzdik aktrısa dep tanyldy.

2024 jylǵy kınofestıvaldiń negizgi konkýrstyq baǵdarlamasyna eki qazaqstandyq fılm kirdi: tolyqmetrajdy kórkem fılmder bólimine rejısser Danııar Salamattyń «Talaq» fılmi tańdaldy. Fılmniń Shanhaı kınofestıvalinde álemdik premerasy boldy.

«Jańa Azııa talanttary» baǵdarlamasynda Qazaqstan, Reseı jáne Italııa birlesip túsirgen Malıka Mahamedjannyń «Bir kúnnen de kóp» atty taǵy bir fılmi kórsetildi. Ol sonymen qatar álemdik premeraǵa aınaldy.

Baıqaýǵa 105 el men aımaqtan 3,7 myńnan astam ótinim tústi. Іrikteý protsesiniń qorytyndysy boıynsha 29 el men aımaqtan 50 fılm bes nomınatsııa boıynsha «Altyn kýbok» júldesin alý úshin tańdaldy, onyń 38-i álemdik premera boldy.

«Tolyq metrajdy kórkem fılmder» atalymy boıynsha bas júldege 14 fılm, onyń ishinde qazaqstandyq «Talaq» fılmi de baq synady.

Shanhaı halyqaralyq kınofestıvali 1993 jyldan beri ótkizilip keledi.