Qazaqstandyq taksı servısi iri platformalarmen qalaı básekelesip júr
ASTANA. KAZINFORM – Bir jylda Qazaqstanda taksımen 174 mıllıonnan astam jolaýshy saparlaǵan. 2024 jyly bul kórsetkish 73 mıllıonnan asqan edi. Demek, bir jylda sapar sany 2,4 ese ósken. Buryn kóbine erekshe jaǵdaıda paıdalanylatyn taksı búginde kúndelikti qajettilikke aınaldy.
Alaıda úırenshikti qosymsha ýaqytsha istemeı qalsa, jolaýshylarǵa basqa kólik izdeýge týra keledi. Jýyrda elimizde osyndaı qolaısyzdyqtar da baıqaldy. Bul bir ǵana servıske táýeldi bolmaýdyń mańyzyn kórsetti. Óıtkeni naryqta tańdaý neǵurlym kóp bolsa, qyzmet sapasy men baǵaǵa da áser etýi múmkin.
Qazaqstandyq platformalar iri halyqaralyq kompanııalarmen qalaı básekelesip júr? Jolaýshylar men júrgizýshilerge qandaı múmkindik usynady? Otandyq taksı qosymshalarynyń naryqtaǵy úlesin arttyrý úshin ne qajet? Bul týraly qazaqstandyq taksı servısiniń negizin qalaýshy Erlan Shaıahmetov Jibek Joly telearnasynyń «Búgin.LIVE» baǵdarlamasynda aıtyp berdi.
Onyń aıtýynsha, kompanııany qurý ıdeıasy dıspetcher arqyly taksı shaqyrý kezinde týyndaıtyn qolaısyzdyqtarǵa baılanysty paıda bolǵan.
– APARU kompanııasynyń negizi 2010 jyly qalandy. 2011 jyly jumys isteı bastadyq, al 2014 jyly jeke qosymshamyzdy iske qostyq. Ol kezde tapsyrystardy dıspetcherler qabyldaıtyn. Keıde bos kólik tabylmaıtyn, keıde kezek uzaq bolatyn. Al kólikterdiń ornalasqan jerin kórsetetin qosymsha bolsa, jolaýshyǵa jaqyn júrgizýshini anyqtap, qyzmetti jyldam uıymdastyrýǵa múmkindik týady. Biz servısti júrgizýshilerge de, jolaýshylarǵa da yńǵaıly etý úshin osyndaı sheshimge keldik, – dedi Erlan Shaıahmetov.
APARU-dyń basqa platformalardan basty aıyrmashylyǵy – júrgizýshiniń tapsyrysty ózi tańdaı alýy. Qosymshada júrgizýshi ózine jaqyn mańdaǵy jolaýshylardyń tapsyrystaryn qarap, qaısysyn qabyldaıtynyn ózi sheshedi.
– Biz bastapqyda basqa kompanııalardyń modeline qarap emes, óz ıdeıamyzǵa súıenip jumys istedik. Júrgizýshi tapsyrysty qabyldaı ma, joq pa — ózi sheshedi. Jolaýshy jol aqysyn júrgizýshige tikeleı qolma-qol nemese bank kartasyna aýdarady. Kompanııa jolaýshydan aqshany jınap alyp, keıin júrgizýshige bólip bermeıdi. Júrgizýshiler servıstiń ishki balansyn aldyn ala toltyrady, al tapsyrys oryndalǵan saıyn sol balanstan belgilengen soma alynady, – dedi kompanııa negizin qalaýshy.
Spıkerdiń sózinshe, júrgizýshilerdi servıske tirkeý onlaın júrgiziledi. Olar kóliginiń markasy men fotosyn, júrgizýshi kýáligin jiberip, tirkeýden ótedi. Kompanııa málimetine sáıkes, qazir platformada shamamen 5 myń júrgizýshi tirkelgen. Jolaýshylardy qosa eseptegende, servısti paıdalanýshylardyń jalpy sany 1,5 mıllıonǵa jýyq.
Kompanııa Shyǵys Qazaqstan oblysynda keńinen tanymal. Erlan Shaıahmetovtiń aıtýynsha, servıs Óskemende paıda bolǵandyqtan, óńirde paıdalanýshylary kóp. Sonymen qatar APARU Taraz ben Aqtóbe qalalarynda da jumys isteıdi.
Qazaqstandyq taksı servısteri úshin halyqaralyq platformalarmen básekelesý ońaı emes. Bul rette júrgizýshilerge qolaıly shart usyný, jolaýshylardyń senimin qalyptastyrý jáne qyzmet sapasyn saqtaý mańyzdy. APARU ókili servıstiń basty ereksheligi retinde júrgizýshilerdiń tapsyrysty ózderi tańdaýyn jáne tólemniń tikeleı júrgizýshige túsýin atap ótti.
Buǵan deıin Qazaqstanda ıAndeks Go servısteriniń jumysy buzylyp, paıdalanýshylar taksı shaqyrý jáne jetkizý qyzmetterin qoldanýda qıyndyqtarǵa tap bolǵany týraly jazǵan edik.
