Qazaqstandyq taǵy bir tanymal ánshi qamaýǵa alyndy
QONAEV. KAZINFORM – Belgili qazaqstandyq ánshi Ábdijappar Álqoja tártip saqshysynyń zańdy talaptaryna baǵynbaǵany úshin Almaty oblystyq sotynyń sheshimimen 10 táýlikke qamaýǵa alyndy.
Almaty oblystyq Polıtsııa departamentinen málim etkendeı, 6 shildede tártip saqshylary Toyota Camry avtokóligin toqtatty. Tekserý barysynda júrgizýshi kólik quralyn basqarý quqyǵynan aıyrylǵany anyqtaldy.
«Avtokólikti aıyppul turaǵyna jetkizgen kezde KIA Sarnival avtokóligi keldi, onyń jolaýshysy azamat M. (Ábdijappar Álqoja) polıtsııa qyzmetkerlerine qysym kórsetip, quqyq buzýshynyń rásimdelýine kedergi jasaı bastady. Zańsyz áreketterdiń jolyn kesý kezinde quqyq buzýshy polıtsııa qyzmetkerlerine belsendi túrde qarsylyq kórsetti. Er adam medıtsınalyq kýálandyrýǵa jetkizilip, onyń «ortasha» dárejeli mas kúıi rastaldy», - dep habarlady vedomstvodan.
Nátıjesinde kólik quralyn basqarý quqyǵynan aıyrylyp kólikti basqarǵany úshin Toyota Camry júrgizýshisi 10 táýlik merzimge ákimshilik qamaýǵa alyndy. Sondaı-aq sot sheshimimen KIA Carnival jolaýshysy Ábdijappar Álqoja quqyq qorǵaý organy qyzmetkeriniń zańdy talaptaryna baǵynbaǵany úshin ol da 10 táýlikke qamaldy.
Osyǵan deıin kóliktegi Polıtsııa departamenti Qaırat Nurtastyń ústinen «Almaty-Astana» áýe reısinde usaq buzaqylyq jáne densaýlyqqa qasaqana jeńil zııan keltirý faktisi boıynsha ákimshilik is qozǵalǵanyn habarlaǵan edi.
Astana qalasynyń ákimshilik ister boıynsha mamandandyrylǵan soty tanymal ánshiniń isin onlaın qarady jáne sol jerde Qaırat Nurtas málimdeme jasady.
Keıin sottyń qaýlysymen Qaırat Nurtas 15 táýlikke qamaýǵa alyndy.
