Qazaqstandyq taekvondoshylar Serbııadaǵy jarysty sátti aıaqtady

ASTANA. KAZINFORM - Taekvodondan Qazaqstan jasóspirimder jáne jastar quramasy Serbııada ótken  Serbia Open G1 halyqaralyq jarysyn sátti aıaqtady. 

Qazaqstan taekvondo (WT) federatsııasynyń baspasóz qyzmetiniń habarlaýynsha, halyqaralyq jarysta jastar quramasy 4 altyn, 1 qola júlde enshiledi. Sondaı-aq Qazaqstan jastar quramasy medal kestesinde jalpykomandalyq esepte kósh bastady.

Jastardan Nurperzent Samatuly (48 keli), Tasqyn Temirjan (51 keli), Qanat Rahymberdi (68 keli), Egor Shaptefrats (78 keliden joǵary) chempıon atansa, Beket Bolatuly (73 keli) qola júldege qol sozdy.

Al jasóspirimder quramasy 2 altyn, 1 kúmis jáne 3 qola medal jeńip aldy. Atap aıtqanda, Hamzalper Romashkın (61 keli), Dıas Baıdýllaev (33 keli) altyn alsa, Rýslan Statsına (37 keli) kúmis, Ersultan Orazbekuly (49 keli), Sultanmuhammed Rozıev (45 keli) jáne Mıras Esengeldın (65 keli) úzdik úshtikke turaqtady.

Týrnırge álemniń 30-ǵa jýyq elinen barlyǵy 800-den astam sportshy qatysty.

Aıta keterligi, bul 2025 jylǵy Qazaqstan chempıonaty nátıjesinde jasaqtalǵan jańa quram úshin alǵashqy halyqaralyq jarys boldy. Sportshylar jarysqa Túrkistan oblysynda ótken oqý-jattyǵý jıynynda daıyndyǵyn pysyqtady.

Eske salsaq, budan buryn Qazaqstan ústel tennısinen Chehııada ótetin halyqaralyq týrnırge attandy.