Qazaqstandyq taekvondoshy jasóspirimder arasynda álem chempıony boldy
ASTANA. KAZINFORM – Fýdjeıra qalasynda (BAÁ) taekvondodan (WT) jasóspirimder arasynda álem chempıonaty ótip jatyr.
Jarystyń alǵashqy kúninde 61 kelige deıingi salmaqta baq synaǵan qazaqstandyq Romashkın Hamzaalper jeńimpaz atandy.
Romashkın fınalda 0:11 esebimen kanadalyq Nıkola Samordıchqa ese jiberip turyp, úshinshi raýndtyń aıaqtalýyna 20 sekýnd qalǵanda, jeńisti julyp aldy. Qorytyndy esep – 17:15.
Romashkın Hamzaalper álem chempıonatynyń fınalyna deıin Iordanııa, Iran, AIN jáne Taıpeı ókilderimen kezdesip, olardy tize búktirdi.
Dúnıejúzilik dodaǵa 80 elden 811 jasóspirim taekvondoshy qatysyp jatyr. Álem chempıonaty 14 mamyrǵa deıin jalǵasady.
Eske sala keteıik, budan buryn Qytaıdaǵy týrnırde taekvondoshy Batyrhan Tóleýǵalıdyń jartylaı fınalǵa shyqqanyn jazǵan edik.