Almaty oblysynda alǵash ret aýqymdy dron-shoý ótedi

ALMATY. KAZINFORM - 25 qazan – Respýblıka kúni merekesine oraı Qonaev qalasynyń Ortalyq alańynda úlken merekelik shara uıymdastyrylady, dep habarlaıdy Almaty oblysynyń ákimdigi.

Keshki baǵdarlama saǵat 17:00-de bastalyp, tanymal estrada juldyzdarynyń qatysýymen kontsert ótedi. Merekelik keshtiń hedlaınerleri – Esko, Ray jáne Nursultan Nurberdıev.

Keshtiń basty sáni – Almaty oblysynda alǵash ret ótkiziletin dron-shoý bolmaq. Keshki aspanda júzdegen dron kóterilip, jaryq arqyly túrli beıneler men kompozıtsııalar jasaıdy.

Oblys ákimdiginiń málimetinshe, bıyl elimiz Memlekettik egemendik týraly deklaratsııanyń qabyldanǵanyna 35 jyl tolýyn atap ótýde. Bul tarıhı qujat – qazirgi Qazaqstannyń táýelsiz memleket retinde qalyptasý jolynyń bastaýy.

«Respýblıka kúnine oraı óńirde júzdegen merekelik is-shara uıymdastyrylyp jatyr. Olardyń qatarynda bıznes qaýymdastyǵynyń ókilderimen kezdesýler, jastarǵa arnalǵan ekskýrsııalar, forýmdar men konferentsııalar bar. Al 25 qazanda Qonaev qalasynyń Ortalyq alańynda kúndizgi jáne keshki kontsertter ótip, merekeniń sharyqtaý shegi retinde erekshe dron-shoý usynylady. Bul is-shara demeýshilerdiń qoldaýymen ótkizilip, turǵyndar men qonaqtarǵa tamasha syı bolmaq», – delingen ákimdik habarlamasynda.

Uıymdastyrýshylar qala turǵyndary men qonaqtaryn otbasymen birge kelip, bıylǵy jyldyń eń áserli sátteriniń birine aınalatyn erekshe jaryq shoýyn tamashalaýǵa shaqyrady.

Osyǵan deıin Almaty kóshelerin uzartýǵa 150-ge jýyq jer telimi alynatyny týraly jazdyq.