Qazaqstandyq sýretshilerdiń týyndysy Venetsııa bıennale kórmesine qoıylady
ASTANA. KAZINFORM – Bıyl ótetin 60-shy Venetsııalyq óner bıennalesinde Qazaqstannyń pavılony bolady. Kórmege otandyq birneshe sýretshiniń týyndylary qoıylady.
Uıymdastyrýshylardyń aıtýynsha, Venetsııada «Jeruiyq» degen ataýmen elimizdiń zamanaýı sýret óneri týyndylary usynylady. Jeriyq - izdenis pen jol metaforasy týraly qazaq ańyzdarynan alynǵan ýtopııa. Ekspozıtsııalardyń baǵyty - fýtýrıstik.
«Venetsııalyq bıennalege qatysý elimiz úshin óte mańyzdy, óıtkeni ol halyqaralyq deńgeıdegi bedeldi is-shara. Qazaqstannyń óz pavılony bolady, biz ony jalǵa alamyz. Bizdi demeýshiler, metsenattar qoldap otyr, shyǵyndardyń negizgi bóligin solar jabady. Bıýdjetten qarjy qarastyrylmaǵan, mınıstrlik kórmege qatysýdy aqparattyq jáne basqa joldarmen qoldaıdy», - dedi kórme kýratory Danagúl Tólepbaı 60-shy Venetsııa óner bıennalesinde Qazaqstannyń kórmesin uıymdastyrýǵa oraı ótken baspasóz máslıhatynda.
Eki jylda bir ótetin halyqaralyq kórmege elimiz resmı ekinshi jyl qatysqaly otyr.
«2000 jyldardyń basynda Qazaqstanda zamanaýı óner asa joǵary deńgeıde bolmady, qazir bizde tájirıbe jetkilikti. Otandyq sýretshilerdiń keıingi býyny shetelde bilim alyp, halyqaralyq deńgeıdegi kórmelerge qatysyp jatyr. Qazir biz mádenıetimizdi kórsetý úshin sheteldik áriptesterimizge júginbeı-aq ózimizdi usynýǵa daıynbyz», - dedi kórmeniń taǵy bir kýratory Ánýar Músirepov.
60-shy Venetsııalyq óner bıennalesinde qazaq sýret óneriniń kórmesi bıyl 20 sáýir men 24 qarasha aıy aralyǵynda ótedi. Oǵan otandyq sýretshiler Kamıl Mýllashev, Erbolat Tólepbaı, Sáken Narynov, The2vvo toby (Lena Pozdnıakova, Eldar Tagı), Sergeı Maslov jáne Anvar Mýsrepovtiń týyndylary qoıylady.
