Qazaqstandyq sýretshi Golden Time Talent halyqaralyq baıqaýynda birinshi oryn aldy
Ásemgúl Súleımenova brıtandyq Golden Time Talent halyqaralyq baıqaýynyń «Keskindeme» nomınatsııasy boıynsha jeńimpaz atandy, dep habarlaıdy QazAqparat tilshisi.
«Keskindeme» nomınatsııasyna 30-dan astam elden 190 adam qatysty. Baıqaýda «Ana men bala» týyndysy úzdik tanyldy.
«Jeńiske jetkenim týraly keshe bildim, basynda tipti senbedim, biraq túsingen kezde bólisýdi jón kórdim. Men bala kezimnen sýret salamyn, balalar kórkemsýret mektebin jáne «Shabyt» óner ýnıversıtetin bitirdim», - deıdi Ásemgúl.
Foto: Ásemgúl Súleımenova
Sýretshi kommertsııalyq jobalar úshin ártúrli tehnıka men stılde jumys isteıdi. Degenmen jeńimpazdyń jumysynan ulttyq erekshelik elementterin jıi kórýge bolady.
Buǵan deıin «Ana men bala» kartınasy Ásemgúl kórmesiniń negizgi bóligi retinde jaqsy pikirge ıe bolǵan.
«Keıingi kezde baıqaýlarǵa qatysa bermeımin. Bul baıqaýǵa qatysý týraly sheshim kenetten qabyldandy. Jazda kórmem ótkende, avtorlyq kartınalar serııasyn saldym. Ortalyq eksponat «Ana men bala» kartınasy boldy. Men onyń adamdarǵa qatty unaǵanyn, jurt odan kóz almaǵanyn baıqadym. Mundaı baıqaýdyń ótip jatqanyn kórip, birden qatysýǵa ótinim berýdi sheshtim», - dep bólisti jeńimpaz.
