Qazaqstandyq sýretshi Djennıfer Lopeske erekshe kilem-kartına syılady
ALMATY. KAZINFORM — Sýretshi Ásel Bekjan Kazinform agenttigine bergen eksklıýzıvti suhbatynda Djeı Loǵa erekshe art-nysandy qalaı jasap, syıǵa tartqanyn aıtyp berdi.
Onyń sózinshe, álemdik pop-juldyzben kózbe-kóz jolyǵý múmkin bolmaǵan. Sebebi ol árdaıym nazarda bolyp, janynda qatań kúzet júrgen. Al kartınany tabystaýǵa Almaty qalasynyń ákimdigi kómektesken.
Art-nysanǵa aınalǵan ıdeıa
Ádette 2 aıdaı ýaqyt ketetin mundaı kartına 1 apta jasalǵan. Kompozıtsııa úshin sýretshi Djennıfer Lopestiń eń sátti sýretin tańdap, oǵan Almatynyń sulbasyn qosqan jáne túsi men órnegi úılesetin kilem tapqan. Polotnonyń kólemi — 150×100 sm boldy.
— Men qalyń túkti matalarǵa arnalǵan arnaıy boıaý qoldanamyn, tipti kilemde qalaı sýret salý kerektigi jóninde ózimniń avtorlyq ádisimdi jasap úlgerdim. Bul — graffıtı, klassıkalyq tehnıka jáne gıperrealızmniń qospasy. Eń qıyny — kilemge sýret salatyn oryn tabý boldy. Boıaýlardyń ıisi aşy, úıde jumys isteý múmkin emes. Sondyqtan sýretti úıimniń aldynda, kartınany qorshaýǵa súıep qoıyp, kóshede saldym. Molbert ornyna tórt úlken karton paraǵyn paıdalandym, al kartınany keńse qysqyshtarymen bekittim, — dedi sýretshi.
Juldyzben kezdesý qalaı ótti
Ásel Bekjan kartınany ánshiniń tobyna tapsyrǵan. Al Almatyda ótken kontsertten keıin ol Djennıfer Lopespen fotosessııada júzdesýge múmkindik aldy.
— Men tizimde bolmadym, sondyqtan polıtsııa bizdi stadıonnan tórt ret shyǵaryp jiberdi. Biraq biz úmitimizdi úzbeı, qaıta-qaıta baryp turdyq. Aqyrynda jolymyz boldy — tizimniń sońyndaǵy adamdar kelmeı qalyp, biz ishke kirdik. Bizden telefondarymyzdy tapsyrýdy surady. Djennıfer bizben amandasyp, qol alysyp, birge sýretke tústi. Men oǵan portretin kilemge salyp bergenimdi aıttym. Biraq kartınany onyń tobyna tabys etkenimizdi túsindirýge ýaqyt jetpedi, — dedi ol.
Ánshi syılyqty áli kórmese de, Áseldiń Instagram jelisindegi beınejazbasyn baıqap, ony óz paraqshasynda Stories-ke bólisken.
Eske salaıyq, byltyr sýretshi Ásel Bekjan Memleket basshysy Qasym-Jomart Toqaev pen Reseı prezıdenti Vladımır Pýtınniń aldynda sýret saldy. Bul oqıǵa týraly da ol Kazinform agenttigine áńgimelep berdi.