Qazaqstandyq sýdıalar Darem ýnıversıteti bazasynda biliktiligin arttyrady
ASTANA. KAZINFORM — Qazaqstan joǵary sot organynyń tóraǵasy Aslambek Merǵalıev Anglııa jáne Ýels Joǵarǵy Sotynyń tóraǵasy Baronessa Karrdyń shaqyrýymen Londonda dástúrli túrde ótetin Zań jylynyń ashylý saltanatyna bardy, dep habarlaıdy sottyń baspasóz qyzmeti.
Іs-sharaǵa 60 elden 700-ge jýyq adam qatysty, onyń ishinde sýdıalar, joǵary laýazymdy sot qyzmetkerleri, Korolevanyń keńesshileri (barrısterler), mınıstrler, Eýropalyq sottyń músheleri men advokattar jáne Abý-Dabı, Aýstralııa, Bahreın, Kanada, QHR, Dýbaı, Frantsııa, Japonııa, Malaızııa, Nıderland, Qatar, Sıngapýr, AQSh jáne basqa elderdiń zańgerlik qoǵamdastyǵynyń t. b. ókilderi qatysty.
Sapar barysynda A.Merǵalıev eń bedeldi sot mekemeleriniń biri — Ulybrıtanııanyń Koroldik sotynda kezdesýler ótkizdi. Ol halyqaralyq qatynastar boıynsha jetekshi sýdıalarmen jáne Sot kolledjiniń ókilderimen, sondaı-aq Kommertsııalyq sottardyń turaqty halyqaralyq forýmynyń (SIFoCC) tóraǵasy lord Djon Tomaspen jáne sýdıa Robın Noýlzmen, Chernogorııa men Shvetsııa Joǵarǵy sottarynyń basshylary Valentına Pavlıchıchpen jáne Andres Ekamen, Frantsııa Kassatsııalyq soty palatasynyń tóraǵasy Vınsent Vınomen kezdesti.
— Qazaqstan Joǵarǵy Sotynyń Tóraǵasy óz sózinde Qazaqstan men Ulybrıtanııa Birikken Koroldigi arasyndaǵy áriptestik qatynastardyń serpindi damýyn, eki eldiń joǵarǵy sottarynyń quqyqtyq boljamdylyq pen turaqtylyqty nyǵaıtýǵa beıildiligin, qol qoıylǵan memorandým aıasynda Darem ýnıversıtetiniń bazasynda qazaqstandyq sýdıalar men sot qyzmetkerleriniń biliktiligin arttyrýdy erekshe atap ótti, — delingen habarlamada.
A.Merǵalıev aǵylshyn-saksondyq quqyqtyq júıe negizinde «Astana» halyqaralyq qarjy ortalyǵy (AHQO) sotynyń jáne arbıtraj jumysy týraly aıtty.
Ol Qazaqstandaǵy sot reformasy sottardyń táýelsizdigin nyǵaıtýǵa, sot tóreligine qoljetimdilikti keńeıtýge jáne buzylǵan quqyqtardy qorǵaýǵa, ashyq, qoljetimdi jáne ádil sot tóreligin qamtamasyz etý úshin tsıfrlyq jáne avtomattandyrylǵan sheshimderdi engizýge baǵyttalǵanyna toqtaldy.
Halyqaralyq arbıtraj máselelerin talqylaý barysynda kezdesýge qatysýshylar AHQO jumysyn jáne Qazaqstannyń sot júıesiniń transformatsııasyn alǵa tartty.
Kezdesýler qorytyndysy boıynsha taraptar yntymaqtastyqty keńeıtýge múddeli ekendikterin rastady jáne bul sapar Qazaqstan-Brıtan quqyqtyq yntymaqtastyǵyn damytýǵa, sot tóreligi ınstıtýtyn nyǵaıtýǵa, zań ústemdigi qaǵıdattaryn ilgeriletýge eleýli úles qosatynyna senim bildirdi.
Osydan buryn Prezıdent Joǵarǵy sot tóraǵasy Aslambek Merǵalıevti qabyldaǵanyn jazǵan edik. Memleket basshysyna sot júıesi qyzmetiniń bıylǵy bes aıdaǵy qorytyndysy jóninde málimet berildi.